WILLEMSTAD —  Un selebrashon spesial ta loke ku a tuma lugá djamars mèrdia den haf di Kòrsou den Bahia di Santa Ana, ora ku Kapitan i tripulantenan di e Barku Freewinds a konmemorá ku e barku a yega no ménos ku 400 mil mia di biahe riba laman. Un seremonia kòrtiku a keda organisá na bordo di e barku aki pa asina konmemorá e echo aki. Kapitan Mike Napier di Freewinds a habri e seremonia i a mustra kon e Freewinds for di 1986 a bini Kòrsou i a sa di nabegá den awanan di  Karibe. Tambe a hiba palabra e representante di Maduro Holding, den persona di Sr. Henry van der Kwast, kende ta representá e barku aki na Kòrsou. Sr. Giovanni Atalita ku tin un relashon di hopi  aña ku Freewinds, tambe a keda honrá pa hiba algun palabra na e okashon aki. Sr. Atalita a mustra ku 400 mil mia ta ekivalente na dal 17 buèlta rònt di mundu i a gradesí e barku aki i su personal di tin Kòrsou komo nan base. Freewinds pa promé biaha a yega Kòrsou na luna di sèptèmber di aña 1986 komo “Boheme”. Durante dos aña e barku a konosé un renovashon ekstenso i por a konta ku asistensia di hopi organisashon i trahadónan for di Kòrsou, pa kual despues e barku su nòmber a kambia den “Freewinds” i a usa Willemstad komo e haf pa por a kuminsá su biahe prinsipal na luna di yüni 1988. For di e tempu ei Freewinds a mantené Kòrsou komo nan kas.