WILLEMSTAD —  Den kuadro pa brinda pueblo di Kòrsou shownan na nivel,  djamars awor pa duna bek na pueblo di Kòrsou, Freewinds ta organisá un konsierto di artistanan lokal huntu ku The Freewindsband. E artistanan lokal ku lo presentá ta e konosido Tony Worrel, ku no tin mester di introdukshon. E ta un kantante ku atraves di añanan ku a pasa, a demostrá su klase den interpretashon di músika kontemporáneo. Kadir Snijder ta un hóben kantante ku  ta kresiendo. Ku su bos fuerte, Kadir tur biaha di nobo ta sorprendé e públiko gratamente. Pa djamars awor tambe e ta bai tin un sorpresa super agradabel. Debbie Beaujon ta otro kantante lokal ku fuera di tin su banda ku ta toka komersial na Kòrsou, pa algun aña kaba a bin ta presentá riba Freewinds ku hopi éksito. Debbie ta un tremendo kantante ku tin talento di yega leu internashonalmente. NGN Brazz tambe lo ta presente huntu ku the Freewinds Band. NGN Brazz ta forma pa Norbert Girigorie riba tenor i alto sax, El Gio Atalita riba trombon i Norman Kooks riba tròmpet. E trio aki for di 2007 ta tokando kasi tur siman ku The Freewinds Band. E konsierto aki ta grátis. Sinembargo e asientonan ta limitá i p’esei pa un hende garantisá su lugá, e mester yama 661-3227 pa asina ei konfirmá ku e ta bai.  Bini i disfrutá di un ora i mei di dushi músika riba Freewinds djamars awor. E konsierto ta kuminsá eksaktamente 8 or di anochi. Ta spera tur hende pa 7:30 pm. E barku ta mara kaminda e Helikòpter ta baha, pues pasa Brasami na Panamá i bai abou.