WILLEMSTAD  —  Djamars awor dia 29 di òktober, despues di algun siman den  reparashon na DOK aki na Kòrsou, Freewinds ta bek ku su konsiertonan di tur djamars na bordo pa hendenan lokal. E djamars aki lo tin presentashon di Tony Worrel, Hershel Rosario i hopi artista lokal mas, huntu ku The Freewinds Band ku ya pa e último 25 aña a bin ta  tene konsiertonan grátis aki na Kòrsou. Manera ta konosí, algu ménos ku un luna, e Barku Freewinds tabata den DOK aki na Kòrsou pa algun trabou di mantenimiento i awor ku esakinan ta tras di lomba, e barku a kuminsá nabegá di nobo entre aruba, Boneiru i Kòrsou. Un biaha pa siman, esta tur djamars, Freewinds ta den haf aki na Kòrsou i na okashonnan ta habri oportunidat pa artistanan lokal por presentá. Hopi biaha ta habri oportunidat pa organisashonnan sosial por tene un Fundraising, hasiendo uso di e fasilidat. Den e kaso aki e siman aki, no ta kobra na porta, pues Freewinds i e artistanan lokal ta duna di nan banda den un konsierto grátis pa pueblo di Kòrsou. Esnan ku ta interesá den un o mas karchi, por manda un pin pa Giovanni Atalita na 7AEBA5A3  o un e-mail na giovanni.atalita@gmail.com i e karchi lo keda manda eletronikamente. E shou ta djamars awor dia 29 di òktober 2013 i ta spera tur hende pa 7:30 pm ya ku shou ta kuminsá pa eksaktamente 8 or. Keda pendiente pa mas shou riba Freewinds den lunanan di novèmber i desèmber. Freewinds ya pa mas ku 25 aña bishitando Kòrsou.