Organisashon di 7 di novèmber pa Konseho di Konsulta i UoC

WILLEMSTAD – Konseho di Konsulta di Kòrsou i University of Curaçao Dr. Moises da Costa Gomez (UoC) ta hasiendo e trámitenan pa organisá un foro di diskushon ku lo tuma lugá djárason dia 7 di novèmber próksimo ku e meta pa krea un mihó bista i pa amplia e konosementu di e relashon i kompetensianan dentro di Reino.

For di 2010 ku regularidat a surgi tenshon na e islanan i riba nivel di reino enkuanto aplikashon di e kompetensia di Gobièrnu di Reino pa duna instrukshon (‘aanwijzing’) i e derecho di gobièrnunan pa disolvé parlamentu i ku Staten sa usa e posibilidat pa manda un minister kas ku aseptashon di un moshon di deskonfiansa. Den práktika ta asina ku tin un nesesidat pa amplia e bista – serka habitantenan en general pero tambe serka gobernante i miembronan di parlamentu – enkuanto e kompetensia i e relashonnan mutuo di órganonan importante di Kòrsou i kon e sistema parlamentario ta funshoná. Den hopi kaso bou di e sirkustansianan ei ta pone Gobernador dilanti dilemanan ferfelu. Ku mas konosementu i noshon por evitá diferensianan inesesario di opinion i por krea mihó komprenshon mutuo, loke por kontribuí na un mihó funshonamentu di nos estado di derecho demokrátiko.

Título di e foro di diskushon ta ‘Instrukshonnan i Derecho di Disolvementu’ ku e suptítulo ‘Relashonnan mutuo na nivel di reino i di pais’. E foro di diskushon lo tuma lugá den oula di UoC.

Prof. mr. Lodewijk Rogier i prof. dr. Arjen van Rijn lo tene un introdukshon riba e tópikonan, siguí pa komentario di dos ko-referente, esta mr. Aubrich Bakhuis i prof. dr. Paul Bovend’Eert. E promé introdukshon su título ta ‘E kompetensia di instrukshon di Gobièrnu di Reino den práktika’ i e di dos ta ‘E Derecho di disolvementu frente e regla di konfiansa’. Den un fase mas avansá lo anunsiá mas informashon di e oradornan i e programa pa e foro di diskushon.