Durante di e añanan ku Luna Yen a bin ta eksistí (a kuminsá na 2006), a duna diferente tayer artístiko. Kada tayer, a keda diseñá ku e hóben sentral, poniendo su desaroyo positivo komo punto di salida. Un solo meta- un mihó hende. “Ekspreshon artístiko ta muchu mas ku kanto, teatro i baile. E hóben ta risibí e oportunidat di desahogá su mes, krea konsiensia, amistat i un sentido propio…un karakter fuerte, disipliná, klá pa enfrentá kualke reto ku den bida por presentá”, di akuerdo ku dirigentenan di e proyekto.  Entre e diferente workshopnan ku ta ser duná por hasi menshon di, Moveshon, Akrobásia i Baile, tambe presentashon Teatral (aktuashon) i a ofresé formashon musikal dividí den Kanto i Rap. Resientemente Chosen Stars (ganadó 2013), a bai Ulanda den representashon di Kòrsou kaminda ku e hóbennan a presentá durante un edishon di  ‘Kunst Bende’. Di akuerdo ku Godguidemely Gomez,  “Nos a duna presentashon na e siudat di Amsterdam, esaki tabata un eksperiensia úniko pa nos. Spesialmente pasobra tabata promé bes ku nos a bai kanta na Ulanda, pues tòg nos tabatin miedu ku friu lo por a influensiá nos stèm. Finalmente nos a kanta 2 kansion pa ‘Kunst Bende’- e kansion ku nos a gana Luna Yen kuné i un pòtpuri. E reakshon di públiko ta loke mas nos lo keda kòrda”. Tabata na 2003 ku den forma spontáneo e grupo a lanta despues ku integrantenan Godguidemely Gomez (21) i Ronailys Casimiri (21) mester a kanta huntu durante di un seremonia di entrega di diploma. E reakshon tabata mesora positivo. Despues di esaki a siguí un serie di presentashon di género gospel. Na 2012 Chosen Stars a gana Caribbean Gospel Festival pa despues finalmente nan partisipá na Luna Yen e duo a risibi e prome formashon di kanto di sr. Tony Worrel. Despues, Deborah Gomez (20) tambe a integrá den e grupo, pa huntu forma Chosen Stars ku na 2013 a resultá ganadó máksimo di e proyekto di talento. “Ta e intenshon pa nos avansá den nos arte, nos deseo ta pa realisá un produkshon di kansion ku ta inspirá. Nos no ta kanta gospel só, sino tur kansion ku di un òf otro manera ta elevá espíritu di un hende”, esaki di akuerdo ku e damitanan di e grupo. Despues di kada edishon di Luna Yen aproksimadamente 50 hóben ta keda formá i 20 artista nobo ta nase, aunke ku tur ta artista riba nan mes i tur tin potensial pa sigui sobresalí riba tarima. Tòg ta 1 ganador por tin, athuntu ta skohe algun finalista. Na 2011, Tashanara Ines a sobresalí den gran forma ku su presentashon teatral, na 2012 e grupo di damita Percussion Curves Divas a resultá un di esnan mas gustá i aña pasá na 2013, Chosen Stars a resultá máksimo ganadó di e show di talento. “E sentimentu ta úniko; pa mira un públiko grandi apresiá bo arte”, esaki di akuerdo ku finalista di 2011, Tashanara Ines despues di a regresá for di Boneiru na unda ku huntu ku e grupo di komedia a presentá pa partisipantenan di Luna Yen na Boneiru . “Mi amor pa teatro a risibí un chèns pa wòrdu ekspresá; “Mama Prekupá” e obra ku nos a sobresalí kuné den Luna Yen a risibí un akohida enorme i for di einan mes a sali oportunidatnan pa komo outor mi sigui skirbi obra teatral pa diferente organisashon. Mi ke motivá tur hóben pa partisipá na Luna Yen”, di akuerdo ku Ines. Su kurason ta mas den obra ku ta krea konsiensia. Tres detaye ku e ta tene kuenta kuné ora e skirbi un obra; pone públiko hari, pero na mes momento- ora nan sali bai kas, nan lo mester a siña algu, e obra mester a inspirá pa un akshon positivo. Sea ta kambio òf mehorashon. Inspirashon e ta risibí for di situashonnan aktual den komunidat, vivensia personal òf eksperiensianan di hendenan di dje. “Mi ta enkantá di obranan di Pachi Damon. Mi por disfrutá tambe di un obra di Boskwiri- ámbos ta ponemi hari un mundu, pero na final semper tin un pensamentu. “Tashanara ta pendiente pa su ‘next’ obra “Dikon Get-Away” inspirá un biaha mas pa akontesimentunan lokal. Ya ta pa 5 aña kaba ku Banco di Caribe ta patrosiná e show di talento Luna Yen. Ademas di ofresé un plataforma ideal pa formashon artístiko di e hóben e trayekto di partisipashon ta duna e hóben un ‘boost’ den su bida diario. “E formashon komo hende ta mashá importante pa nos komo patrosinadó. Banco di Caribe ta kompartí e meta di un proyekto di talento manera Luna Yen; brinda e hóben oportunidat di desaroyá den forma positivo bou di guia profeshonal i semper lucha pa alkansá ekselensia”, di akuerdo ku Sr. Dito de Kort, direktor.