WILLEMSTAD- Ministerio di Desaroyo Ekonómiko (MEO) ya pa tres (3) luna konsekutivo a bin ta organisá un Marshe Sosial Ekonómiko titulá BETH.
BETH ta para pa produkto Barata, desaroyo Ekonómiko, desaroyo Turístiko i Habri kuponan di trabou.

For di Aprel di e aña aki MEO a bin ta organisá e marshe aki tur promé djasabra di luna riba Plasa Brion. Dia 8 di Yüli último e marshe a karga e tópiko di patriotismo i a konta ku un total di 240 partisipante.

E meta prinsipal ku kual MEO ta organisá e marshe aki ta pa nos hendenan bende òf eksponé nan produktonan lokal i di e manera aki aportá ku den futuro nan lo por habri nan propio empresa, trese mas bida den nos sentro di siudat i ta e deseo pa ku tempu e marshe bira un atrakshon turístiko.

Den kuadro di esaki MEO ta invitá un i tur ku ta traha su mes produktonan lokal i ku ta aspirá pa den futuro lanta su mes empresa ku esakinan, pa inskribí i tuma parti na e siguiente edishon di BETH kual lo tuma lugá dia 5 di Ougùstus i lo karga e tema di edukashon. Te ku Desèmber di e aña aki e marshe lo ta den un fase piloto di moda ku MEO por midi e nesesidat pa inisiativanan similar meimei di nos komunidat. Mirando esaki, partisipashon na e marshe lo ta kompletamente grátis i liber di eksigensia pa pèrmitnan ekonómiko te ku Desèmber.

Pa mas informashon o pa inskripshon por fabor tuma kontakto ku sra. Julisa Sluis- Alberto na number di telefòn 462-1444 (ekst 127), manda un mail na info.mse@gobiernu.cw, pasa personal na ofisina di MEO (Pletterijweg 43, AmiDos Building) òf via di Bentana di Informashon. Inskripshon lo ta habrí te ku dia 25 di Yüli próksimo i lugánan ta limitá.