Minister Oduber: negociacionnan cu a tuma luga na 2014 awor ta duna bon resultado

Diamars mainta Minister Oduber a tuma un rato den su agenda ocupa pa informa prensa e ultimo desaroyonan positivo tumando luga specialmente pa locual ta trata cuentanan anual cu awor ta concluyendo. Entre nan e cuentanan anual di Aeropuerto di Aruba. E mandatario ta mustra e hecho cu e cifranan pa locual ta trata aña 2015 pa Aeropuerto di Aruba ta hopi positivo y ta cataloga e aña como un bon aña.  Minister Oduber a manda un palabra di felicitacion na henter pa henter e hunta di directiva di nos Aeropuerto pa e resultadonan positivo. Na aña 1997  nos aeropuerto a conoce un expansion grandi di cual mester a haci un fiansa pa esaki. Na aña 2014 esaki a keda completamente paga. Na 2014 a hiba combersacionnan y negociacionnan cu Gobierno di Aruba, unda a acorda cu banda di e dividendo cu gobierno lo haya, lo cuminsa paga tambe pa e servicionan cu ta wordo brinda pa departamentonan di gobierno. Pa 20 aña no a cobra e suma di 6 dollar pa pasahero cu a keda stipula na 1997.  Na 2014 a yega na un acuerdo cu lo cuminsa cu 2.50 dollar pa cada pasahero cu ta di transito na nos aeropuerto. Cu esey den mente mester añadi cu e aña aki ta bira di 2 aña cu nos aeropuerto ta contribui na caha di gobierno cu un asina yama “concession fee” banda di e dividendo cu ta significa un suma substancial. E sumanan aki lo wordo entrega den e cuenta anual di otro siman pa Aeropuerto di Aruba. Den e cuenta anual di 2015 automaticamente lo keda bon defini e dividendo y e “concession fee”. Pa loke ta trata e dividendo cu e mandatario a menciona cu a keda presenta caba, e aña aki esaki ta mas halto cu aña pasa. Si suma e dividendo mas e “concession fee” esaki ta traduci den cifranan cu ta surpasa tur perspectiva cu ta tabata tin pa cu e contribucion cu lo mester ricibi di nos Aeropuerto na e fondonan di Gobierno.

Minister Oduber a bolbe duna un palabra di pabien na tur esnan cu ta labora na nos aeropuerto.

E cifranan positivo aki naturalmente ta un muestra tambe di e negociacionnan cu a tuma luga na 2014 cu awor aki ta duna su resultadonan pa cu presupuesto tambe di Aruba pa loke ta trata 2016. Minister Otmar Oduber: “Ta mustra cu locual nos a premira no solamente nos a logra, pero a surpasa esaki cu mas of menos un 25% pa loke tin den presupuesto 2016 como entrada di Aeropuerto.”

Aeropuerto lo sigui expande pa por maneha e demanda grandi cu tin pa Aruba. Cu tur e plannan na caminda esaki lo nifica mas beneficionan economico tambe pa Aeropuerto Reina Beatrix cu na su turno lo traduci na beneficionan economico positivo pa Gobierno di Aruba.