A anuncia mesora Fofoti Adventures:

ORANJESTAD, Aruba – November 2015: Riba dia prome di november Fofoti Tours & Transfers a cumpli su prome lustro y diabierna anochi a tene un bunita celebracion y introduccion di expansion di e compania cu Fofoti Adventures. E compania a cuminsa na 2010 cu cinco bus cu a capta atencion di biaha cu e iconico Fofoti di Eagle Beach como simbolo di nan inspiracion y raiznan fuerte. Pa conmemora e exito di nan compania cu ta ofrece un nivel di servicio di calidad cu a causa un revolucion den e mercado di tournan y transfer, Fofoti Transfer & Tours a invita amigonan y partnernan den turismo pa un celebracion di gratitud. Tabata un gran honor pa gerencia y personal di Fofoti Tours & Transfers por a conta cu presencia di esunnan cu a brinda nan apoyo y a contribui na nan operacionnan for di e establecimento di e compania. Fofoti tin e reputacion di ta un compania cu por depende riba dje y ta ofrece excelencia y inovacion, cu servicio di calidad halto cu ta haci un diferencia grandi den e mercado. Atencion na detaye y cumplimento cu e necesidadnan di e cliente ta central den nan filosofia di negoshi cu e vision pa semper surpasa e expectativanan di e cliente. E compania a sigui crece y na 2014 a transporta cerca di 50 mil pasahero hunto cu companianan local di maneho di destinacion manera ECO Destination Management Services, Red Sail Sports y Epic Destination. Ademas, nan ta conta cu partnernan den e industria crucero manera Pullmantur, Royal Caribbean, Carnival Cruises, MSC Cruises, Aida Cruises, y mas. Fofoti Tours & Transfers a bira tambe hopi popular pa gruponan priva. Fofoti no ta distingui entre su clientenan, servicio excelente y atencion ta na e top di nan lista y ta un honor y placer pa semper provee servicio personalisa pa medio di empleadonan hospitalario, cariñoso, profesional y multilingual.

Sharlise Croes, kende ta managing director y e entrepreneur cu a cuminsa cu e compania dinamico, a expresa cu hopi entusiasmo con honra e ta cu e acogida cu Fofoti Tours & Transfers a ricibi for di comunidad. El a expresa cu ta un honor pa sirbi e amigo y partnernan di Fofoti durante di e prome cinco añanan di e compania y un placer pa por sigui padilanti, introduciendo expansion, agregando Fofoti Adventures cu nan prome 15 UTV, cu lo wordo poni den servicio na 2016. Sharlise Croes a gradici e empleadonan cu ta forma parti di e trayectoria bunita di e compania, esta Jully, Christiaan, Ereline, Sylvia, Carmen, Maritza, Irvin, Garcia, Stanley, James, Jean, Frank y e sales manager nobo di Fofoti, Jacky Croes. Den nomber di e Hunta di Directiva y Gerencia, a expresa aprecio pa nan compromiso cu e compania, nan perseverancia y lealtad y pa e sosten di tur empleado pionero cu a yuda prepara y introduci e compania. Como un compania hoben y dinamico, Fofoti ta sigui desaroya y progresa. Sharlise Croes a splica cu e secreto di e compania ta cu “nos ta haci loke nos ta stima y nos ta hacie bon, cu pasion y dedicacion”. Fofoti Tours & Transfers y, cuminsando na 2016, Fofoti Adventures ta sigui cu e vision pa innova, pa expande y desaroya Fofoti den un di e companianan di transportacion lider na Aruba y tin e ambicion pa bira conoci como e miho di Caribe. Concluyendo su discurso Sharlise Croes a gradici tur e partnernan den turismo cu a brinda e compania nan amistad y sosten pa logra e desaroyo cu e compania hoben ta gozando di dje.