WILLEMSTAD- 16 di desèmber 2022 – Resientemente a tuma lugá firmamentu di e akuerdo pa finansiamentu di Área di RekreashonZakito fase 2. E akuerdo a keda firmá entre Minister di Desaroyo Ekonómiko, sr. Ruisandro Cijntje den representashon di Gobièrnu di Kòrsou i sr. Hugo Clarinda, direktor athunto di Ofisina di Turismo di Kòrsou (CTB). Presente na e firmamentu di e akuerdo tabata Minister di Tráfiko, Transporte i Planifikashon Urbano, sr. Charles Cooper, SG di Ministerio di Salubridat, sr. Sharlon Melfor den representashon di Minister enkargá ku Salubridat, Medio Ambiente i Naturalesa, sra. Dorothy Pietersz – Janga i Counterpart Director di CTB. sr. Muryad de Bruin.

Den e temporada tras di lomba por a tuma nota ku a konstruí i drecha diferente fasilidat na e área di Koredor komo parti di e asina yamá Quick Win Plan pa Zakito. E di dos fase di desaroyo di Área di Rekreashon Zakito, kual ta keda detayá na e momentunan aki, lo enfoká riba diferente fasilidat adishonal manera mehorashon di e playa, protekshon di kosta, mehorashon di e bulevar, iluminashon di kaya, sistema di kloaka, landscaping, diferente bòrchi di informashon i tambe e infrastruktura nesesario pa awa i koriente.

Kordinashon di e proyekto ta den man di CTB miéntras e fondonan a keda fasilitá pa Ministerio di Desaroyo Ekonómiko. Supervishon di e konstrukshon ta na enkargo di Heren2 Caribbean. E trabounan ta planiá pa inisiá di dos kuartal di 2023. E desaroyo di Área di Rekreashon Zakito den e añanan benidero ta konsentrá riba ofresé tantu nos komunidat lokal i tambe nos turistanan un eksperensia mas agradabel konforme e vishon pa e área kual a keda aprobá pa Gobièrnu di Kòrsou.