Minister Otmar Oduber sumamente contento cu exito di festival cultural

Apesar cu Minister Otmar Oduber ta na Hulanda cu un gran cantidad di reunion cu ta tumando lugar na diferente nivel y cu e apertura di “Gezichten van Aruba” na Hilversum Museum, e mandatario ta hopi pendiente di e desaroyonan tumando luga aki na Aruba den cuadro di nos celebracion nacional. Sr. Oduber a declara di ta sumamente contento cu e prome fin di siman di Un Canto na nos Himno y Bandera a conta cu un publico masal apoyando nos hobennan participante. Cada un anochi a conta cu un publico di mas di 3000 persona cu a bishita e evento riba Linear Park. Un vision cu Minister Oduber tabatin pa habri e aspecto cultural aki poniendo e festival den un espacio publico, cu a demostra fructifero mirando bek na un fin di siman cu un festival cu a carga apoyo masal. Aruba a ranca sali riba un bon pia pa loke ta nos celebracion nacional di 30 aña di nos Status Aparte y 40 aña di nos Himno y Bandera. 30/40 ta un celebracion grandi pa cual Gobierno di Aruba a percura pa dorna nos isla pa crea e ambiente di nos celebracion nacional y pa cada un di nos por ta orguyoso di nos logronan. Sr. Oduber ta declara cu na Hulanda e palabra orguyo a resona conectando e palabra na nos hendenan. E propio Minister Plasterk di Hulanda a menciona e hecho cu hopi ta e Arubianonan orguyoso di nan isla y sigur cu esaki ta contagioso hasta pa nos madre patria di por bisa cu nan tin un isla den Caribe cu ta Aruba.

E mandatario ta lamenta di no por tabata presente pero lo t’ey sigur pa e festival e fin di siman aki unda lo tin e categoria di nos adultonan aportando na nos Cultura. Festival Un canto na nos Himno y Bandera a aporta cu riba 100 composicion completamente nobo dedica na nos isla, treci padilanti pa cada un cantante expresando nan orguyo y amor, engrandeciendo nos Cultura.

Minister Oduber kier a probecha e ocasion pa manda un palabra di felicitacion special pa Ezahayra Artage ganado absoluto di e categoria 4-6 aña, Genevan Maduro ganado di categoria 7-9 aña, Jadiene Croes ganado di categoria 10-12 aña, Zaina Falconi ganado di categoria 13-17 aña y tur e finalistanan cu a haci un tremendo presentacion durante e festival Un Canto na Nos Himno y Bandera infantil y hubenil. Un palabra di gradicimento na cada un mayor, musico y tur cu por a contribui pa haci participacion di cada un mucha posibel. Tambe na tur cu di un of otro manera a forma parti di organisa e tremendo apertura aki pa nos celebracion nacional.

Aruba ta celebra den grandi cu un cantidad di evento durante henter e luna di maart, Minister Oduber ta invita comunidad completo pa sigui apoya cada evento demostrando e orguyo y amor cu cada un di nos tin pa nos pida baranca.