WILLEMSTAD, RBC Royal Bank,Samenwerkende fondsen, Curoil i Teatro Luna Blou ta invitabu na e tremendo “Festival di Historia Nobo di 24 pa 27 novèmber na La Tentashon.

Un biaha mas Teatro Luna Blou tin su festival di historia kaminda eskritornan nobo ta haña oportunidat di skibi nan mes historia.

E aña aki Milushka Birge tabata na enkargo di e parti di skibimentu. Den e periodo di skibi, Milushka a duna diferente táyer kaminda eskritor nan nobo a haña diferente informashon di kon skibi nan mes historia. Kiko ta e puntonan ku mester tene na kuenta ora ta skibi un historia. Diferente hóben i adulto a forma parti di e táyer nan di kual dies partisipante ta bai forma parti di e festival.

Despues di e trayekto di skibi, a sigui e parti kaminda a buska regisor pa dirigí e diferente historia nan. E aña aki e festival ta konta ku partisipashon di Humphrey Monte, Franklin Salgado, Eduard Reineta, Clay Toppenberg, Norma Cova i Shudeska Cicilia.

E direktor nan aki ta den preparashon pa dia di e kompetensia. Kaminda lo saka e ganadó ku lo bira un obra teatral òf short movie. Pa saka e ganadó i finalista nan di e proyekto aki lo presentá e historia nan den forma di “Dramatical Reading”.

E Dramatical Reading aki lo tuma luga di 24 pa 26 di novèmber 7or di anochi i dia 27 di novèmber 4or di atardi na La Tentashon. Karchi Naf 10,- pa dia optenibel na 24 uur uit de muur, Mensing’s Caminada òf Time to Time.