WILLEMSTAD – Fundashon Bon Intenshon, enkargá ku organisashon di Festival di Pueblo dia 2 di yüli den Otrobanda, ta sumamente orguyoso di e manera ku Kòrsou a gara e selebrashon di e dia aki. E entusiasmo pa e dia ta grandi.

E programashon di e dia aki lo no bai stroba e programa ofisial di Dia di Bandera na Brionplein; alkontrario, e lo bai komplementá e dia aki. Nos lo selebrá huntu e amor ku nos tin pa nos patria i reflekshoná riba kiko por hasi pa nos pais mehorá.

Durante e dia aki, na Festival di Pueblo nos lo duna informashon di diferente organisashon ku ta aktivo pa nos komunidat. Lo tin diferente stènt informativo, edukando nos riba diferente tereno. E parti aki ta konsentrá pa gran parti na Molenplein.

A lo largu di e ruta di Neto Bar pa Brionplein, Kòrsou su folklor, su músika, su baile, su teater, su kushina, su arte i su bokanan dushi lo ta di fiesta e dia aki. Loke nos ta pidi un i tur ta: ban kolaborá ku otro i ser modelo di e suidadano ehemplar. Ban disfrutá di nos Dia di Bandera i bo Festival di Pueblo.