Dos dia di aktividat pa rekauda fondo pa sigui desaroya nos zoologiko nashonal Curaçao Zoo

Durante un atardi ameno den Supermerkado Vreugdenhil sra. Mariela Perestrelo Vreugdenhil a yama un i tur bon bini na e rueda di prensa pa presenta e prome PUMPKIN FESTIVAL na korsou, e Festival di Pampuna aki ta algu ku e supermerkado lo organisa na benefisio di nos zoologiko nashonal djasabra 28 di oktober for di 9or di mahinta te 5or di atardi.

E prome edishon di festival di pampuna lo tin diferente ítem, di prome lo bo por kompeti ku bo bon di kompra pa rei e peso di e pampuna di mas grandi na korsou ku ta den e supermerkado, esun ku rei e peso exakto lo gana 500 florin na kompra na Vreugdenhil Supermarket.

PUMPKIN CARVING COMPETITION

Pa prome bes lo organisa un kompetensia di dekorashon di pampuna, pa unikamente 12,50 bo ta inskribi i risibi bo pampuna i bo kit di carving(koba) pa bo traha bo diseño, e aktividat aki lo tuma luga for di 9or di mahinta te ku 5or di atardi, pues bo tin bastante ora pa logra krea un fantasia ku por gana diferente premio atraktivo. E ganador di e kompetensia lo wordu anunsia djadumingu 29 na Curaçao durante Boo at the Zoo.

FESTIVAL DI PAMPUNA

Bo por imaginabo un cafetaria jen jen di repa di pampuna, bolo di pampuna, li di pampuna, ijscream di pampuna, sopi pampuna i hopi kos di pasa boka mas traha di pampuna, tur esaki i mas lo bo por disfruta di dje for di 9or di mainta te ku 5or di atardi den cafetaria di Vreugdenhil supermarket.

E evento aki ta kompletamente na benefisio di nos zoologiko nashonal Curaçao Zoo.

BOO at the ZOO

E di dos aktividat  aki den un weekend karga pa nos zoologiko nashonal lo tuma luga na Curaçao Zoo mes di 3or di atardi pa 8or di anochi, entrada lo ta kompletamente gratis, pero bo mester bin disfrasa! Boo at the Zoo ta refleha na e selebrashon di Haloween pero na un manera edukativo i amistoso.

Boo at the Zoo ta un aktividat kaminda hinter famia por bin siña diferente kos, entre nan lo tin un stand informativo di Bat Conservation Curaçao  ku ta un organisashon ku ta enfoka riba kuido di nos raton di anochi (vleermuis) na korsou i islanan serkano, tambe nos lo tin un experto di insekto i reptil pues hopi informashon balioso pa nos sa kon pa kuida nos naturalesa i medio ambiente pa e animalnan ku ta wordu konsidera ril i monstroso tambe risibi e atenshon ku  nan merese.

Tambe lo tin facepainting, weganan di feria, obra di man i trick or treat.

TRICK OR TREAT Durante di e evento aki e muchanan lo traha nan mes saku di “treat” (kos dushi) i después lo kana den Curaçao i topa diferente figura, por ehempel  Frankenstein,spanta para, Willy wonka, drakula i hopi mas ku lo yuda e muchanan buska nan treatnan dor di duna nan tarea pa hasi, un atardi sumamente edukativo i den un esfera familiar ku ta loke e team di Curaçao Zoo ta traha ku alma i kurpa pe.

Bo ta keda kordialmente invita pa bishita e dos eventonan aki den weekend di 28 i 29 di oktober próximo.

POTRET Na mesa: links pa rechts Srta.Taniushka Rosinda i Hubèrt Isenia di Curaçao Zoo i sra. Mariela Perestrelo Vreugdenhil representante di Vreugdenhil Supermarket. I  tambe potret di e pampuna mas grandi na Korsou.