Djasabra 11 Aprel ……den é Grandioso Selebrashon 38 Aña
Dia 11 Aprel próksimo, pues Bispu Pasku di Resurekshon Anochi, Agrupashon musikal ERA tei selebrá nan di 38 aña di eksistensia den mundu farandulero lokal i pa e okashon aki, Mathey Werf na Otrobanda a wòrdu skohé komo esenario pa e Gran Selebrashon aki ku lo bai konta tambe ku animashon di FERNANDO VILLALONA ku su Orkesta for di Repúblika Dominikana i tambe GENTZ ku na e momentunan aki ta den super gran forma, despues ku nan kantante estelar Rey Laufeur a ser korona komo e mas resien Rei di Tumba 2020.
Despues ku e informashon di e “Fiestón” aki a keda publiká siman pasa, a lanta un interes enorme pa ku esaki, pues un indikashon kla ku e Selebrashon 38 aña ERA sigur lo bai dal sumamente duru.
VILLALONA LO PRESENTA TUR SU EKSITONAN
FERNANDO VILLALONA kende ta un di e artistanan Dominikano hopi gusta aki na Kòrsou a enfatisá ku durante e Fiesta aki lo e bai presentá únikamente su éksitonan ku a hasié asina popular rònt mundu manera entre otro “America Latina”, “El Carnaval”, “No Podras”, “Penelope” i un kantidat di éksitonan mas, pa laga e públiko ku lo bai ta presente disfrutá tur afó di su éksitonan un tras di otro.
GENTZ lo bai prepará pa e okashon aki un repertorio speshal bon varia i ku e enfoke pa buta e ambiente pa laga tur hende gosa i hasta pa no laga niun hende baha for di e pista di baile. Finalmente ERA no mester niun introdukshon paso “Ambiente” ya ta den nan nòmber kaba i ta músika di e diferente periodonan di ERA lo bo bai ta sendé durante e anochi aki.
MATHEY WERF E SITIO DI SELEBRASHON
Manera ya a ser indiká, Mathey Werf na Otrobanda enfrente Teater Luna Blou, ta e sitio kaminda e tremendo fiesta baliabel aki lo bai tuma lugá. Pa e okashon e werf lo wòrdu dekorá i transformá realmente den un super bunita Sala di Baile den aire liber kantu di awa, den pleno sentro di siudat.
Un kompania di Seguridat kualifiká lo bai sòru pa e parti di seguridat tantu paden komo pafó. Pues tur bishitante por disfrutá di e tremendo ambiente di e fiesta, miéntras nan vehíkulo ta wòrdu bon kuida pafó.
BENTA DI KARCHI
Mathey Werf lo bai wòrdu parti den dos sekshon ku lo ta Sekshon General i Sekshon V.I.P. Karchinan pa e dos sekshonnan aki, lo ta na e siguiente preisnan Sekshon General ku lo ta Fls. 65,– ku lo ta optenibel na e establesimentunan Mensing’s , Beep Beep, 24 Uur Uit de Muur i na Fun Miles lo tin karchi di sekshon general i VIP konforme e pakete promoshonal di Fun Miles.
Karchi VIP ta respektivamente na rason di Fls. 250,– p.p. na mesa di 10 personaku ta All In i tambe Fls 200,– p.p. na mesa di 4 persona ku ta inkluí 5 bebida di bo gusto. Por kumpra di VIP eksklusivamente na Mensing òf por yama tambe na e number 511-3433 pa reservashon òf informashon.
DJASABRA AWOR GIMMICK KARCHI FLS. 50,– NA LICORES MADURO
Únikamente djasabra awor 7 mart Licores Maduro ta lansa e tradishonal “Gimmick” den kuadro di e Grandioso Selebrashon 38 Aña ERA ku benta di un kantidat limitá di no ménos ku 300 karchi di e sekshon General ku ta kosta normalmente Fls. 65,–, na e preis spesial di solamente Fls. 50,–.
E Ganganaso aki lo ta optenibel únikamente na The Store na Licores Maduro, for di 9or di mainta te ku 1or di mèrdia.Kada persona por kumpra un máksimo di 2 karchi. Kòrda si ku miéntras tin na stòk lo bende, esun ku bini promé ta bebe awa limpi !!!