E fecha pa e moveshon di “AWE NO” ta ser posponé pa dia 16 di aprel benidero. E fecha a ser kambia debí ku nos ta konta ku altá presensia di algun invitado spesial ku no por ta presente mas na e aktividat di dia 26 di mart ku ta Djasabra di Aleluya. Pero tur kos ta keda meskos i ta solamente e fecha a kambia. E proyekto “AWE NO” ta un inisiativa pa asina nos tur komo pueblo di Kòrsou uni i laga nos bos resoná. Dia 16 di aprel 12’or, 1’or i 2’or di mèrdia pueblo kompletu lo saka sonido di protesta pa 1 minüt largu. Esaki por pa medio di bo bos haltu, bati panchi, wea, supla flùit, pita outo etc. Mirando ku e presensia di tur nos invitadonan ta hopi importante, Moveshon “AWE NO” ta hasi un súplika pa nos tur su bos ban kuminsá resoná mas fuerte, p’esei tambe nos a skohe e fecha nobo ku ta bira 16 di aprel ku ta “WORLD VOICE DAY INTERNATIONAL” pues un dia internashonal di bos i komunikashon.

“AWE NO” ta para pa kura violensha, trese pas i trankilidat riba nos isla i alabes trese union i felisidat riba nos dushi isla Kòrsou. T-shirt pa “AWE NO” ta kosta solamente Fls 10,- i ku esaki nos por yega na fondonan pa asina nos hasi donashon na 3 fundashon prestigioso, i alabes pa tur wikènt “Task Force AWE NO” por bishita un bario kaminda nos ta organisá diferente aktividat pa asina kontribuí na bienestar di kada habitante. Nos ta bai den barionan i organisá charla edukativo, aktividatnan den enseñansa, deporte, sekshon ku informashon kultural tambe aktividat i workshop inspirativo ku ta bai uni mucha, hóben i adulto huntu. Di e manera aki nos ta informá pueblo kompletu ku a kumpra e T-shirt di “AWE NO” ku e fecha ofisial awor ta dia 16 di aprel ku ta dia internashonal di bos i komunikashon i ku e konsierto ta tuma lugá na Sambil di 19:00-22:00. Pa e konsierto tin varios artista di Kòrsou ku tambe ta bai duna un man pa asina konhuntamente nos trese trankilidat riba nos dushi Kòrsou. Bo T-shirt di “AWE NO” ta bo entrada. Ku bo Fls 10,- bo ta kontribuí pa ban kura violensha i alabes bo por disfrutá di un bunita konsierto. Pa pedido i mas informashon yama 521-3700. Por yama tambe 560-6225 i pasa kumpra bo T-shirt tur dia, i asina abo tambe ta kontribuí, i bisa ku bos haltu “AWE NO” ban kura Violensha!