Tropical Bottling Co. sosteniendo eventonan local

ORANJESTAD, Aruba – 6 di April 2018: E aña aki ta tuma luga e evento di “Faya Bo Haya 9” di Destroyer Racing, riba 2 dia, esta diabierna 6 y diasabra 7 di April na Palo Marga, cu competencia den diferente categoria. Durante e competencia aki lo conta cu presencia di Wenny, un hoben di 14 aña, e “Caribbean Drift Queen” di Boneiro.

E categorianan di Faya Bo Haya 9 ta Scooter-Quad- Jr. Dragster-Go kart, Faya Bo Haya Bracket, Faya Bo Haya Bike, Faya Bo Haya Street, Faya Bo Haya Truck y Faya Bo Haya Bonus. Den e evento aki tin atraccionnan nobo manera esun di truck, pero Wenny tambe lo ta dunando show riba su quad. Pa prome biaha den Faya Bo Haya tin e competencia di Demolition Derby y aki ta conta cu 3 auto di Demolition Derby di Corsou. E competencia di Demolition Derby lo ta entre Aruba y Corsou, pero tambe ta conta cu presencia di MC Monti.

Diabierna 6 di April e porta lo habri pa 4:00pm, pero e rond di cualifica lo cuminsa pa 6:00pm, mientras entrada lo ta 15 florin pa adulto. Diasabra dia 7 di April porta lo habri pa 5:00pm, unda cu e rond di eliminacion lo cuminsa pa 5:00pm y e entrada lo ta 20 florin pa adulto. Jason Geerman di Destroyer Racing a sigui bisa cu por cumpra e pakete pa tur dos dia pa 25 florin, mientras cu entrada pa muchanan bou 12 aña ta 5 florin pa dia.

Jason Geerman a gradici tur sponsor, esta Tropical Bottling Co., Shell Helix Ultra, Ibis Bearing, Jay’s Tire Shop, Riu Take Away, HMK Cleaning & Services, Post Aruba NV, Juver Cargo, Lucho Towing, Setar NV, Jayko Septic Tank, Frani’s Towing, 3D Heavy Equipment, Exotic Boost, Nitroxx Aruba, RaceJunkies.com, Evolution Production, The Chronicles of Boost, Radical Competition y Charles Grill, pa por a haci Faya Bo Haya 9 posibel.

Destroyer Racing y Tropical Bottling Co. ta invita tur hende pa yega Palo Marga y presencia e competencianan di Faya Bo Haya 9 y disfruta di tur producto di Balashi.