WILLEMSTAD – E konosido kantante Yu di Kòrsou, Farley Lourens, ya pa algun luna kaba ta den preparashon ku e konosido trombonista/areglista lokal Hector Sampson pa regraba su klásiko balada na papiamentu; Awe No T’ayera. Hector Sampson,  ku a kompañá i skirbi areglo pa hopi kantante lokal i internashonal, a traha riba un areglo nobo pa e popular kansion ku Farley a graba ku El Gran Poder de la Salsa 35 aña pasá na Puerto Rico. “Mi a respetá e areglo original, pero a usa harmonia i akordenan mas al dia pa e grabashon aki,” Sampson a bisa. “Tempu ku ami a lanta mucha ku interes pa siña toka trombon, e agrupashon El Gran Poder de la Salsa di Kòrsou sigur tabata di gran inspirashon i motivashon p’ami. ‘Awe No T’ayera ta un klásiko di nos tesoronan musikal i mi kier a duna mi aporte na konservá e kansion ku na 1978 a ser editá riba disko vinil.” Farley Lourens mes na su turno ta bisa; “E kansion aki tin un historia pekuliar su tras. Un di mi koleganan den Gran Poder tabata Erwin Cadeau (perkushonista) kende lástimamente a fayesé resien. Na un okashon despues di un ensayo el a aserká mi i mustra mi algun frase ku el a skirbi pa un idea ku a tabatin den su kabes pa un kansion. El a spliká mi su inspirashon y bisá mi wak kiko bo ta hasi kuné.” Esei Farley a hasi tambe. El a hinka su mes den e tema i a kaba di skirbi e komposishon i agregá melodia. “Gran Poder de la Salsa pa mas ku un aña a prepará na 1977 / 1978 pa bai graba un L.P. ku mira pa break thru den e difísil merkado di Salsa internashonal. E balada na Papiamentu en kuestion no tabata pas den e plannan ei. Riba mi insistensia a manda e komposishon Santo Domingo pa skirbi su areglo.” “Grabando den studio na Puerto Rico, e agrupashon Gran poder a hala masha atenshon di músikonan ku tabata pasa ratu ratu na studio,” Farley ta sigui konta. “Hasta e kos a bira manera un boka bisa otro y nan tabata pasa pa kuriosidat, pa skucha i sera konosí.” Na Puerto Rico e agrupashon a haña oferta pa firma un kontrato ku e seyo diskero Rio Piedras Records. E seyo ta lansa un sensillo komo disko 45 di un bolero ku Farley a graba ku Gran Poder de la Salsa. Interesante tabata despues di regreso di e agrupashon di tende di doñonan di e kas diskera manda informashon ku tabata indiká ku e bolero tabata entre e 10 kansionnan mas pidí na emisoranan na Puerto Rico. Sorpresivo, y ainda mas interesante, tabata e hecho ku D.J.-nan na Kòrsou a pick up e balada na papiamentu  Awe No T’Ayera i pueblo a hasié nan kansion favorito di aña. “Mi ta kòrda kla ku e aña ei e kansion a keda masha hopi siman tras di otro na promé lugá di hitparadenan lokal i ku el a sali di dos tras i un kansion di e grupo ABBA riba Top 100 di aña, ” Farley a sigui konta. Den e próksimo dianan, radionan lokal lo kuminsá zona e vershon nobo di  e tremendo kansion ’Awe No T’Ayera’. Djasabra dia 14 di sèptèmber Farley lo ta invitá na presentashon di e agrupashon WESU na Daiquirí Piano Bar na Holiday Beach Hotel. “Mi a kanta masha hopi mes den e hotèl aki: den lobby, den Pianobar, den nightclub, den salanan grandi, den kasino, pafó riba teraza, around the pool, bou di palapa, na beach. I djasabra dia 14 nos lo interpretá algun kansion di Gran Poder de la Salsa huntu ku Wesu Salsa Dura. Nos lo hasi algun kos tambe di Ruben Blades ku e tempu ei tabatin un influensia hopi grandi huntu ku Willy Colon. Farley Lourens ku tin un rekòrt den festival di tumba komo e úniko kantante kompositor ku a sali Rei Tumba na tres okashon siguí. Dia 14 di sèptèmber awor, pueblo di Kòrsou lo haña oportunidat pa skucha e grupo bibu den Daiquiri Piano Bar na Holiday Beach hotèl / Venetto Casino ora ku WESU Salsa Dura i su kantantenan Jr. Alves i Amanda Pang kombiná ku Dj. Wendell Martis di Café con Son na Radio Hoyer, toka pa esnan presente por disfrutá i naturalmente e artista invitá Farley Lourens. Entrada pa e fiesta aki ta apénas 10 florin. WESU Salsa Dura i Farley Lourens lo bai bek den pasado i rekordá e tempu dushi di El Gran Poder de la Salsa ku tempu di nan tempu tabata un dje bon agrupashonnan musikal aki na Kòrsou i ku a gosa ku éksitonan grandi. Pa esnan ku ta interesá den karchi, por haña esaki serka integrantenan di WESU o por yama Hector Sampson na 698-5597. Ambiente sigur ta garantisá for di 10 or te ku oranan tempran di mardugá den Daiquiri Piano Bar na Hotel Venetto.