WILLEMSTAD —  Djasabra último dia  7 di sèptèmber 2013, Farley Lourens a drenta Studio di grabashon i a bolbe graba e kansion Awe No T’ayera ku el a graba 35 aña pasá ku El Gran Poder de la Salsa na Rio Piedras, Puerto Rico. Pa e okashon aki Farley a graba voz riba un areglo nobo di Hector Samson, lider musikal di WESU Salsa Dura, den TMZ studios na Kòrsou. Por skucha Farley interpretando e areglo di Hector Samson pa promé bes bibu durante fiesta ku tin djasabra awor den Daiquiri Piano Bar den Venetto Casino. Grabashon di e tracknan vocal tabata na enkargo di e ingeniero Jerrel Paula, kende alabes a perkurá pa mesklahe i matrisashon di e grabashon. E siman aki mes por skucha e grabashon nobo aki lo ta na radioemisoranan lokal i pa djasabra un i tur ta invitá pa skucha e kansion bibu. Banda di e kansion en kuestion Farley lo interpretá otro kansionnan ku Gran Poder a graba na kabamentu di añanan 70, pero den un bachi nobo di WESU Slasa Dura. Lo rindi tributo na e musikonan di Gran Poder i tambe alabes na Willy Colon y Ruben Blades ku tabatin influensia grandi riba musika Latino Amerikano, na kabamentu di añanan setenta, i te ku fecha a sigui ta inspiradónan pa miones di hende rònt mundu ku nan komposishonnan i músika.