WILLEMSTAD, Curaçao 2015: E gran festival musikal Viva La Musica Latina ta presentá e banda musikal tropikal for di Venezuela Guaco ku lo ta riba esenario dia 29 di mei próksimo.  Guaco a wòrdu fundá na 1968 pa Mario Viloria, Gustavo Aguado i Fernando Dominquez. E nòmber di e banda ‘Guaco’ a wòrdu dediká na un para ku tabata bishitá kas di Mario regularmente durante ensayo di e banda. Despues di algun aña aktivo Mario a retirá for di e banda pa motibu di estudio, pero a sigui produsí músika pa e banda komo kompositor prinsipal. E banda a kuminsá komo un banda ku ta presentá e género musikal gaita for di Zulia;  despues Guaco a desaroyá i transformá den un banda ku ta presentá un lista diversifiká di ritmo manera Salsa, Vallenato, Gaita, Músika Pop, Jazz, Funk i asta Rock and Roll. Durante 5 dékada Guaco a produsí un total di 40 disko kompakto hasiendo e banda aki un di e bandanan di mas produktivo na Venezuela ku kuantioso gira anual den tantu Venezuela, Merka, Oropa i Hapon. E lider históriko di e banda Gustavo Aguado kende a sa di reinventá  e banda den kada produkshon ta e persona responsabel pa a mantené e banda su eksistensia, benta di disko kompakto i nivel artístiko. Websáit: http://www.guaco.org 

Tokante  “Viva La Musica Latina Curaçao 2015”:

Lo tin riba esenario durante dos anochi, shete artista. E konsierto lo tuma lugá riba lugar di parker di Sambil riba e anochinan di 29 ku 30 di Mei próksimo. Un tereno kompletamente asfaltá, hanchu, pues ku hopi espasio. Lo ta e promé evento grandi ku lo tuma lugá na SAMBIL Curaçao; un punto stratégiko, fásil pa yega n’e, ku e posibilidat pa stashoná outo riba e mes tereno ku e evento ta. Pa e gran evento aki lo tin un solo esenario pa públiko disfrutá di kada un di e konsiertonan sin pèrdè niun piesa. Ta konstruí un esenario enorme, sufisientemente grandi pa garantisá kambio rápido di un agrupashon pa otro, 30 minüt entre kambio di agrupashon musikal. Artistanan ku lo presentá riba djabièrnè dia 29 di Mei lo ta Guaco, Gilberto Sta. Rosa i Jorge Celedón. Riba djasabra 30 di mei lo presentá, Jose Alberto El Canario, Gran Combo de Puerto Rico,  Alberto Barros i Olga Tañon. Riba tur dos dia ta kuminsá 7.30PM. Entrada ta stipulá na 350 florin pa pakete di 2 anochi i 200 florin pa kada anochi respektivamente. Por kumpra karchi riba krédito via di Norsa N.V -akudí na Kaya Acacia 28 telefon 767 1563 òf na Punda telefon 461 4810.  Tambe tin posibilidat pa kumpra karchi ‘online’ via di www.ticketscaribbean.com; paga, print e-ticket i bin kuné riba e anochinan di konsierto. Pa mas informashon tokante di Viva La Musica Latina por bishitá e página di Facebook òf por yama 737.2025 ext. 135. Keda pendiente pa algun kampaña interesante riba e página di Facebook di Viva La Musica Latina.