WILLEMSTAD – Personanan ku ke limpia nan área durante e akshon boluntario World Clean Up Day Curaçao 2020 tin te djasabra 12 di sèptèmber pa registrá. Den e siman despues di e akshon di limpiesa, riba 19 di sèptèmber, e organisashon ke entregá tur firma ku a kolekshoná di un petishon ambiental grandi. Te ainda mas o ménos 4000 persona a firma.

Fundashon Curaçao Clean Up, inisiadó di e petishon i koorganisadó di World Clean Up Day na Kòrsou, ta kontentu ku e atenshon ku tin aworakí pa sushedat ambiental pero ta krítiko tambe. “Minister Jesus-Leito tin e ambishon pa denter di sinku luna logra hasi nos isla limpi. E ministerio GMN ta sostené e akshon aki pues lo ta fantástiko si nan por kontinuá ku meta aki. Pa logra esaki mester di medidanan struktural si nos ke pa nos isla keda limpi. Si no aki mitar aña nos por kuminsá kompletamente di nobo, segun presidente di  e fundashon Maarten Schakel, ku ta enfatisá ku un isla limpi ta kuminsá na promé lugá serka habitantenan ku no ta tira nan koroto riba kaya.

Petishon

Stichting Curaçao Clean Up a inisiá ku e petishon 2 siman pasá i ta enserá sinku punto di akshon. Baha e gastunan pa depositá shushi na Landfill drástiko. Polis mester kontrolá mas severo riba personanan ku ta tira shushi afó. Mester bini prohibishon riba ‘single use plastic’. Mester bini mas baki di shushi riba lugánan públiko. Gobièrnu mester inisiá ku un kampaña di informashon i edukashon pa un periodo largu kontra shushedat ambiental. Miéntras tantu tin 4000 persona ku a firma e petishon riba  it.ly/korsoulimpi. Segun inisiadónan mester por tin hopi mas tantu firmante.  Despues di World Clean Up Day Curaçao e fundashon ke entregá e petishon na Gobièrnu, Parlamento i komersio pasombra segun e fundashon tur tin un ròl klave den e puntonan di akshon menshoná. 

World Clean Up Day 2020

Riba djasabra 19 di sèptèmber ta tuma lugá pa di ocho aña konsekutivo un akshon di limpiesa nashonal bou di e nòmber World Clean Up Day Curaçao. Boluntarionan por registrá nan mes, òf un grupo di amigu, famia, bisiña òf koleganan riba www.worldcleanupdaycuracao.org. Meta ta pa hasi e área rondó di bo bunita i nèchi i pa mustra un posishon kontra shushedat riba nos isla.

Kontakto ku Gerstenbluth

E organisashon di e akshon di limpiesa a tuma kontakto ku dr. Izzy Gerstenbluth i te siman pasá ta mustra ku organisá un akshon masal di limpiesa den periodo di corona por tuma lugá na un forma responsabel. E akshon ta tuma lugá den airu liber repartí bou di un área hopi grandi.  Ademas e organisashon ta insistí riba tene distansia sosial, bisti tapaboka (mondkapje), èkstra Handsanitizer i hanskun. Un siman promé ku World Clean Up Day Curaçao  lo evaluá ku e outoridatnan si ta responsabel kontinuá ku e akshon di limpiesa.