FMG den pre-show pa Burna Boy
WILLEMSTAD: Aki 2 siman ta tuma lugá e magno konsierto di Burna Boy na Kòrsou. Mester bisa ku tur kos ta kanando tremendo pa un públiko di riba 6,000 hende disfrutá di e konsierto tan antisipá. Awe, faltando dos siman, SUN SPLASH ta anunsiá FMG (Family Money Gang) den e pre-show line-up i di e manera ei añadí mas ambiente i fervor na e konsierto. FMG ta popular ku e kansion ‘Boot’ ku tin riba 2.7 mion views riba YouTube i ta kosechando un éksito rotundo den e ambiente dancehall, R&B i Hip Hop na Hulanda. Ta imposibel drenta un diskotèk na Hulanda sin skucha òf baila algu di FMG. Naturalmente, nos propio artista lokal B’Jay tambe ta bria riba esenario den pre-show. B’Jay tambe tin un asombroso 800k views riba YouTube i ta hopi popular pa e.o Balaclava- ta sigur ku e hoben artista, ku lo bin kompañá pa otro artistanan lokal invitá, duna un tremendo presentashon i asina representá e senario lokal di urban!
Ta nifiká ku awor den pre-show lo tei FMG, B’JAY, MC Chris Strick, MC Don T, Dj Krokzz, Dj Fab i Dj Lambo. Ta pidi pa tur hende tuma nota ku ta spera riba 6,000 hende dia 28 di òktober benidero, esaki ta nifiká ku ta importante pa for di 6’or kuminsá forma liña di entrada. Portanan lo habri 7’or di anochi i lo kuminsá mesora ku e line-up, un tras di otro pa na final di e anochi Burna Boy presentá ku su live band!
Ta kòrda tur hoben ku mester ta kompañá pa un adulto. Ta pidi pa tur hoben kana ku nan ID durante di e konsierto. Mester bisa ku praktikamente tur sekshon VIP ta ‘sold out’- ku eksepshon di algun karchi mas p’e área ‘Location’- e área di mas grandi- ku ta e ‘standing’ dilanti di stage. Fanátikonan ke ta serka di artista ta p’esei mes a hasi e konsierto aksesibel pa tur hende. SUN SPLASH, Key Caribe i Unique Productions ta invitá Kòrsou p’e konsierto di BURNA BOY ku su banda aki na Kòrsou! Karchinan ta optenibel na tur punto di benta i riba caribbeanticketshop.com