Mas òf menos 40 mucha a bishitá e museo pa mucha huntu ku EY

Willemstad – Trabou boluntario durante di EY Connect Day ta duna empleadonan di EY e oportunidat di bou di oranan di trabou pasa tempu ku nan koleganan den un otro ambiente i alabes e chèns pa krea un mihó komunidat (“Building a better working world”). Pa e okashon aki e muchanan di Blenchi school ta tin e oportunidat pa disfrutá di un mèrdia interaktivo i edukashonal.

Na aña 2010 ‘EY Americas’ (e sekshon merikano di e kompania Ernst & Young) a lansa e evenemento anual, EY Connect Day. Un dia riba kual tur kantornan di EY na Merka riba mesun dia ta organisá un proyekto boluntario ku e meta pa kontribuí na un komunidat mas konektá i mihó. Riba 5 di òktober EY Curaçao a selebrá su di sinku EY Connect Day.

Mirando bèk riba e proyekto bolunatrio di delaster sinku añanan nos por mira ku durante EY Connect Day 2014, EY Curaçao a organisá weganan olímpiko EY pa hobennan di Fundashon Kristal (Buena Vista). Na 2015 EY a organisá un aktividat na St. Jorisbaai ku e tema ‘Resiklá i nos medio ambiente’ pa hobennan di skol Chema Maduro/Angela Jessurun (Montaña). Na 2016 e tema tabata ‘Kome salú i moveshon’. E hobennan di van Houteschool (Brievengat) a ser invitá na un mèrdia den Hòfi Kas Kòrá. Hobennan di siklo 1 i 2 di Kolegio San Hose (Barber) na 2017 ta tin e tema ‘Müzik i komunikashon’ i e aña aki Blenchi school (Otrabanda) a ser invitá na un mèrdia kreativo, edukativo i alegre na ‘Children Museum’ ku e tema ‘soña i deskubrí’. E museo ta brinda un ambiente ku ta stimulá kuriosidat i kreatividat.

Mas òf menos 40 mucha di Blenchi school huntu ku e empleadonan di EY a partisipá na diferente weganan edukativo den i rondó di e museo. E museo ta stimulá diferente sensor, ta pone e hobennan man na obra, ser aktivo i e ta un sitio adekuá unda e muchanan ta liber pa eksplorá e mundu ku nan ta biba aden. Tambe e ta un luga kaminda pa medio di weganan interaktivo den diferente zona di eksihibishon di e museo i na un manera kreativo e hobennan por sera konosí ku eksperensianan nobo. E muchanan di Blenchi school a ser guiá i motivá pa e personal di EY pa laga nan soñonan guia nan kreatividat.

Pa EY Curaçao komo ún di partnernan fundador di ‘Children’s Museum’, e lokashon aki tabata perfekto pa e tema di EY Connenct Day ‘Soña i deskubrí’. Esaki ta brinda un oportunidat pa introdusí e museo na empleadonan di EY i alabes kompartí e e eksperensia aki ku hobennan di Blenchi school, kual ta kai den grupo ku e museo ta mek riba dj’é. Tantu e muchanan di Blenchi School komo e personal di EY a risibí un tremendo eksperensia.