Den trahe por mira e saya pretu di e mucha muhé i e garganta pretu di e mucha hòmber ku ta simbolisá e “turn table” ku e DJ ta hasi su tan gustá “scratch” den un meskla di músika. Notanan musikal ku ta rondoná kurpa di hende i ta hasi kasi imposibel pa keda sin move riba e tononan musikal. Mucha muhé tin un peluka di koló riba kabes i mucha hòmbernan un oudifon. Na sintura di e mucha hòmbernan nan tin un faha di CD pa representá e modernismo ku DJ tin awendia pa músika digital. Esaki ta pa duna e toke ekstraordinario na un trahe di fantasia di e DJ pa un evento super spesial.  A hasi uzo di kolónan bibu pa ilustrá e efekto di klaridat ku e lusnan di e DJ ta trese. Na mes momentu duna símbolo na e alegria ku ta reina den e temporada akí.

Den man por apresiá e bala di spil, un oudifon, mikrofon, lusnan di koló, disko, CD i notanan musikal. Tur poné di tal forma ku e ta krea un obra di arte pa e toke final na e trahe  Fantasia di DJ ekstraordinario

Grupo di parada di hubentut D’Friends ta presentá e aña akí Extraordinary DJ Fantasy. E hóbennan ke ilustrá ku durante selebrashon di karnaval, DJ-nan ta hopi esensial. Sin DJ, hopi grupo lo no tin kompañamentu musikal. Sin kompañamentu musikal, ta difísil pa baila i gosa nos dushi tumba i roadfirenan ku ta trese e zjeitu den e ambiente tan gusta di nos pueblo. A pone atenshon na e aspektonan di ántes manera entre otro e disko pretu i tambe nos tempu moderno kaminda CD i MP3 entre otro ta e fuente pa músika pa e DJ-nan.

Ku e trahe akí Grupo D’Friends ke gradisí i duna tur DJ lokal i internashonal ku ta duna nan aporte pa trese músika pa hinter pueblo por disfrutá durante e temporada di fiesta aki.

Diseño: Fernon Koeiman

Kosedó: Mora More

Elaborashon i adorno: Shuhail Winterdaal (Su)

Tur hoben ku ta desea di forma parti di D’Friends por subi nos website www.dfriensgroup.com of tuma kontakto ku nos na tel: 5171771 ,pa asina bo tambe forma parti di e grupo ku mas ambiente pa e parada di teener pa 2016