Despues di tour pa mas ku un luna na Europa, e leon di reggae, Junior Tecla ta kla i karga pa los e temblor di reggae na e prome festival di reggae: Curaçao Reggae Festival! Despues di a skucha e demanda di e publiko pa mas reggae, Junior Tecla a forma un line-up impreshonante di algun di e tremendo artista di reggae internashonal pa ofrese Korsou un eksperensha di reggae ku lo laga asta esnan ku no ta masha amante di reggae gosa di e festival aki ku lo marka historia. E line up ta kompleto: Direktamente for di Jamaika, e bos sensual di Shuga lo hipnotisa tur hende i su presentashon, lo laga e publiko pidi pa mas. E talentoso Maikal X, kende tabata antes miembro di Postmen tambe ta kla pa duna Korsou un presentashon tremendo. Danki na e kolaborashon di e fundashon Art Rules Curaçao, ta hasi posibel pa Maikal X, partisipa na Curaçao Reggae Festival. E artista di reggae rap, Ashwin Jaydee, di Surnam, tambe ta join e line-up di e artistanan internashonal kual huntu ku Junior Tecla i su banda for di Hulanda, All Star Reggae Band, lo presenta un Tributo na Bob Marley mas miho ku nunka. Pero esei no ta tur kos: riba e tarima di Curaçao Reggae Festival lo presenta 16 artista lokal, manera VibeNation ku Farley Fairbairn, Issocco, Capoeira show, reggae dance show ku lo yuda hasi e evento un reggae festival di taya internashonal. Landhuis Brievengat lo habri su portanan for di 5.00 di atardi. E presentashon bibu lo sigui te ku marduga. Pero esaki no ta final di e anochi. Mesora na un otro area di Landhuis Brievengat, e Groove Lounge DJ’s lo sende e kandela di e after party ku lo laga tur hende gosa te ku 4.00 di marduga. Reggae ta para pa AMOR i UNIDAT i ta pesei Curaçao Reggae Festival a kompromete nan mes pa krea un area speshal pa personanan ku tin un desabilidat fisiko pa nan tambe por bin gosa di Curaçao Reggae Festival. Tambe Curaçao Regggae Festival huntu ku Go Weekly magazine a regala karchi na fundashonan manera Alton Paas, Uniek Curaçao, I-Animal i varios otro organisashon ku ta hasiendo un tremendo trabou den nos komunidat. Karchi ja ta na benta i ta optenibel na balor di naf. 45,-. Speshal pa e amantenan di reggae ku ke gosa estilo di Bob Marley, tin karchi Bob Marley VIP na balor di naf. 95,-. E Bob Marley VIP kual ta limita, ta ofrese entrada express, toilet priva, parkeerplaats paden, boter di bebida, VIP view, mesa ku stul, bar priva ku waiter i Meet & Greet ku e musikonan. Karchinan ta obtenibel na Mesings Caminada, Albert Heijn, Beep Beep, Bruna, Van Den Tweel, i De Heeren. Curaçao Reggae Festival ta birando un evento mas grandi di loke a premira. Ta pesei lo no tabata posibel pa hasi e evento aki sin no ta pa sosten di Licores Maduro, Insel Air, TeleCuraçao, New Day, Massive, Living Green, Cannabis energy drink, Polar, Go Weekly, OnTop Magazine, Coca Cola, Little Souk, Reboot, and FunMiles. Curaçao Reggae Festival lo sigui demonstra e lema di reggae “Un Amor” na nos komunidat, dor di diferente kampanja ku lo bai tuma luga den e siguiente simannan. Pa keda na altura, sigui Curaçao Reggae Festival na: www.facebook.com/Curaçaoreggaefestival .

ONE LOVE.