ORANJESTAD: Recientemente Fundashon Real Madrid a realisa su prome clinica na Aruba. For di juli 11 pa juli 15 muchanan di entre 6 pa 13 aña di edad por a participa na e clinica cu a tuma lugar na Sasaki Sport Arena. Digicel ta masha orguyoso di por tabata un di e patrocinadonan di e proyecto aki, hunto cu Banco di Caribe. Por mira bek riba un clinica hopi exitoso y cu sigur lo ta un experiencia inolvidabel pa e muchanan.

Bou di guia di Rodrigo Blanco entrenador diReal Madrid Foundation Academy participantenan a haya e oportunidad di train uzando metodologia y filosofia di Real Madrid CF. Ta interesante pa menciona cu e clinica a concentra pa 80% riba e deporte y pa 20% riba balornan di ekipo- cu por wordo uza den cualkier deporte. Tur mucha a duna nan maximo, sinembargo por a saca unicamente 3 MVP (Most Valueable Player), nan ta di Grupo Benzema U7: Jobriel Lacle, di Grupo Modric U10: Linneth Oberto y di Grupo Modric U10: Daniel Spitalieri. Caracteristicanan cu a busca den e MVP ta e balornan cu ta identifica Fundacion Real Madrid, manera liderazgo, trabao den ekipo, disciplina, compromiso y compañerismo. E ganador di e clinica a resulta e hoben Gion Aparicio di Grupo Kroos U13. Su comportacion, talento y personalidad ta haci cu otro aña e por bay Madrid pa representa Aruba den e torneo mundial cu lo tuma lugar na Real Madrid Sport City na Valdebebas.

Riba diahuebs tabata tin un dia dedica na Digicel SportsMax. Riba e dia aki e muchanan a demostra nan talento mientras cu ehecutivonan di Digicel tabata apoya e talentonan hoben. Digicel ta masha orguyoso di por a patrocina 40 mucha pa forma parti di e clinica aki, mescos cu a haci na 2019 na Corsou y Boneiro ora cu a brinda oportunidad na 60 mucha pa forma parti na e clinica.  Den transcurso di añanan Fundacion Real Madrid a organisa alrededor di 474 clinica di futbol den 45 pais. Mas di 47,853 hoben a beneficia di e programa aki.