RBC ta organisá otro evenemento pa kliente di Business Banking

Willemstad – RBC Business Banking ta konosí pa su eventonan úniko kaminda profeshonalnan ta duna konseho pa krea e ambiento adekuá pa yega na oportunidatnan pa siña kos nobo. Resientemente RBC Business Banking huntu ku Santé Finance a organisá un evento pa kliente kaminda mas di 20 kliente di empresa chikitu, mediano i grandi a keda invitá. Meta di e evento aki tabata pa informá e kliente i pasa konosementu p’e pa asina e kliente siña kon e tinku praktiká business management na un manera eskitoso.

RBC a skohé e tópiko a base di e nesesidat di e kliente di business banking. E kliente spesífiko aki hopi bia ta papia di su lucha pa dirigí un kompania ku ta finansieramente sano. Durante nan presentashon Farida Biervliet i Ronnie Gruppen di Santé Finance – un kompania ku ta ofresé servisionan di konseho i accountancy – a enfoká riba e tres puntonan prinsipal ku ta yuda e empresario yega na un business management eksitoso. E tres puntonan aki ta: planiamentu di cash flow, kòntròl interno i informashon di management konfiabel i na tempu. Maske Biervliet i Gruppen ta rekonosé e importansha di kuentanan anual puntual pa mira kon e kompania tabata pará den pasado, nan ta ripará ku hopi kompania ta lucha ku reportahe di esaki. “Pa splika na un manera simpel: imaginá bo mes ku bo kompania ta un outo. Planiamentu di e cash flow ta e gas ku bo tinku primi pa bo kompania por kore. E kòntròl interno ta e motor di bo kompania i e audit interno ta e service ku bo mester duna bo outo. Informashon di management ku ta up-to-date i konfiabel ta bo dèshbord: bo mester sa kon duru bo ta koriendo awor aki. No algun luna of un aña pasa, awor aki”, asina Biervliet a splika. Gruppen a amplia riba e importansha di planiamentu di cash flow. “Ganashi ta un opinión. Cash flow ta un echo. Asta kompanianan ku tin ganashi por wòrdu konfrontá ku problemanan ora ku un debedó keda sin paga. Ora ku un empresario ta buta e parti di sèn na promé lugá, su kompania lo sobrebibí riba término largu. Esaki alabes ta yuda e management dirigí su atenshon riba kòntròl di gastunan, mehorashon di kobransa di montantenan atrasá i subida di e ganashi di e kompania”, asina Gruppen a deklará. Tantu Gruppen komo Biervliet a splika detayadamente kon tinku apliká e proseduranan korekto pa kòntròl interno pa asina prevení ladronisia, fraude i raportahe inkorekto.

Russell Kopke, e Area Vice President di RBC na Kòrsou i Boneiru a splika: “Lokual publiko por saka for di e seshon informativo aki ta ku banko no por ninga e kliente – ku tin e konseptonan básiko den su poder –fasil. Esaki ta konta sigur ora bo tin un grupo profeshonal manera Santé Finance ku ta kompilá bo informashon pa bo.” Pierrot Hurtado, e Country Manager di RBC na Kòrsou i Boneiru, a gradisí e oradónan i e invitadonan pa e seshon di informashon i a bisa: “Keda hasi lokual boso ta hasi mihó i laga e profeshonalnan hasi sobrá. RBC tei pa yuda bo kompania krese. Gustosamente nos ta papia ku bo di bo kompania i bo nesesidatnan.”

E tim di RBC Business Banking den koperashon estrecho ku Santé Finance a organisá e di 11 evento eksitoso kaminda a dirigí e atenshon riba e kliente. Dor di kolabora ku partnernan manera Santé Finance RBC por kumpli ku su promesa na su kliente: pa ofresé nan e mihó konseho pa nan por guía nan kompania ku éksito. E lema di RBC ta: “helping clients thrive and communities prosper.” Konsekuentemente i regularmente RBC a organisá mini-seminar i enkuentronan i nan ta ansioso pa otro posibilidat pa organisá mas evento pa nan klientenan.