Porfin! Dia 24 di Sèptèmber ta e momentu. E dokumental ku nos a warda hopi tempu, Sombra di Koló – The Shadow of Color di antropólogo Angela Roe i sinematógrafonan Selwyn de Wind i Hester Jonkhout ta estrená na Teatro Luna Blou. Kiko koló di kueru i rasa ta nifiká awe’n dia? Antropólogo Angela Roe ta buska un kontesta. Durante su buskeda dor di e barionan Barber, Seru Fortuna, Otrobanda, Janwe i Spaanse Water trinta Yu di Kòrsou ta konta nan historia.

Meta

Meta di Sombra di Koló / The Shadow of Color ta pa kibra e tabú riba koló i rasa i kuminsá un diálogo nashonal konstruktivo tokante di un topiko ku ta afektá tur hende. Pasobra tur hende tin un koló, i tur hende tin un historia. Pues bin wak, skucha, i papia. Mario Kleinmoedig lo guia e debate ku lo tuma luga despues di e presentashon.

Warwarú ImageNation Foundation

Sombra di Koló ta un produkshon di Warwarú ImageNation Foundation, un fundashon nobo ku ta traha ku e bunita ademas ku e doloroso aspektonan di nos herensia kolonial. Ku Sombra di Koló Warwarú ImageNation Foundation ke krea persepshonnan nobo; di un banda saliendo for di e orguyo i plaser ku nos ta sinti pa ku e diversidat ku nos ta forma parti di dje kada dia, anto di e otro un banda e doló, bergwensa i frustrashon ku hende ta sinti – tin bia diariamente – komo konsekuensia di nan koló.

Pa Ken?

E dokumental ta dirigí na henter pueblo di Korsou. E produktornan ta spera ku tur hende di un manera of otro lo rekonosé nan mes den e historianan, ma prinispalmente ku nos tur lo siña di dje algu nobo. E dokumental, ku a wordu realisa ku yudansa finansiero di entre otro Refineria Isla, Prins Bernhard Cultuur Fonds Caribisch Gebied, Samenwerkende Fondsen Nederlands Gebiedsdeel i Act II, ta na Papiamentu, Hulandes i Ingles ku suptitulo na Ingles.

Sombra di Koló Art Exhibit

E dokumental ta akompaniá dor di e Sombra di Koló Art Exhibit, den lokual dies artista lokal ta eksplorá e temanan di rasa i koló di kueru den nan obra artístiko. E eksposishon spesial ta grátis, i lo tuma lugá riba tereno di Teatro Luna Blou, for di 24 di Sèptèmber te ku 31 di Òktober.

Dianan di Presentashon & Benta di Karchi

24 Sèptèmber 20:00 estreno (kantidat di karchi ta limitá)
25 Sèptèmber 20:00   |   26 Sèptèmber 20:00   |   1 Òktober 20:00

10 Òktober 13:00 & 20:00   |   17 Òktober 20:00

Karchi pa e dokumental Sombra di Koló ta obtenibel na Teatro Luna Blou fór di 4 di Sèptèmber, pa Nafl. 13,50. Kaha ta habrí di 4 pm te ku 8 pm. Pa mas informashon wak riba www.warwaru.com i facebook.