WILLEMSTAD – E promé evento di e fundashon Ride for the Roses Curaçao (RFTRC) pa rekoudá plaka pa e fondo di kanser PWF (Prinses Wilhelmina Fonds) ta tuma lugá djaweps dia 1 di desèmber ku e estreno lokal di e pelíkula  ‘Sully’ den e teater The Cinemas na Riffort.

Fundashon RFTRC ta pasa e pelíkula pa rekoudá fondo. Na rason di 50 florin pa persona ta bende karchi. Por kumpra karchi serka e miembronan di direktiva di RFTRC, na Mensing’s Caminada, 24 Uur uit de Muur i Van den Tweel Zeelandia. Riba e anochi mes di 1 di desèmber ta risibí e wéspetnan for di 7 or ku entretenementu, kos di bebe i di ches, miéntras ku tin dos orador invitá: un persona ku a sobreviví kanser i señor Tobias ‘Tito’ Cordeiro. E último aki lo konta di su eksperensia komo purser na bordo di e avion di ALM ku dia 2 di mei 1970 ora kombustibel a kaba i nan a baha na laman 60 kilometer for di St. Croix den oranan di atardi. Den e kaso aki 23 persona a pèrdè nan bida, entre nan su kolega stewardess Margareth Abraham ku nan a honra dunando e plenchi na aeropuerto Hato su nòmber.

Storia real

E pelíkula ta trata e storia real di e kapitan Chesley ‘Sully’ Sullenberger di US Airways i e promé ofisial Jeffrey Skiles ku dia 15 di yanüari 2009 a skapa bida di 155 hende ora nan a disidí pa hasi un aterisahe di emergensia eksitoso den e riu Hudson. E dia ei buelo doméstiko # 1549 a lanta for di aeropuerto La Guardia na New York na kaminda pa Charlotte Douglas International Airport na Charlotte, na e estado North Carolina. Apénas tres minüt na kaminda na mas òf ménos 850 meter di altura e Airbus A320 a topa ku un bird-strike serio. Un kantidat di ganso a dal den ámbos motor i pone ku nan a paga. Sin un aeropuerto den serkania e kapitan Sullenberger a disidí pa baha e avion den e riu kaminda hopi barku ta trafiká di New York, esta e riu Hudson. Di e insidente aki na e riu tin imágennan real ku nan a meskla ku susesonan esenifiká na bordo i spesífikamente den e kabina di piloto. Tur 155 persona na bordo, tantu pasahero komo tripulante, a sobreviví.

Eror di piloto

Djis despues di e insidente prensa i e públiko grandi a deklará Sullenberger komo héroe, pero e mes mester a purba sigui biba ku e imágennan dje último minütnan di e buelo den su kabes. Komosifuera tur e esenanan aki ya no sufisientemente espektakular, e storia ta bira mas tenso ora e investigadónan Merikano di NTSB aparentemente tabata ke demostrá ku e kaso aki ta debí na un eror di piloto. Segun algun alegashonnan original, un di e dos motornan tabatin sufisiente kapasidat ainda pa por a baha e avion seif na un aeropuerto den besindario. Ta te despues ku a saka tur dos motor for di suela di e riu i a investigá nan, a resultá ku e pilotonan no tabatin niun falta. Na final e pelíkula ta mustra imágen di un re-enkuentro di esnan ku a sobreviví e buelo, tantu pasahero komo tripulante, den e museo di aviashon Carolinas kaminda nan a eksponé e avion ku a aksidentá.

Tom Hanks komo Sully

E konosido aktor Tom Hanks ta desempeñá e papel di kapitan Sullenberger i ku Aaron Eckhart den e papel di Skiles. Direktor di e pelíkula Sully ta Clint Eastwood i e senario ta obra di Todd Komarnmicki basá riba e biografia di Chesley Sullenberger i Jeffrey Zaslow. Na sèptèmber último a estrená e pelíkula aki na Merka. E pelíkula a hala salanan bon yen despues di diferente reseña positivo, pero el a lanta tambe hopi kontroversia pa loke ta e ròl ku National Transportation Safety Board (NTSB) a desplegá.