Tokante bida i trabou di Nic Møller di Avila Hotel

WILLEMSTAD – Djaweps dia 30 di aprel awor den Teatro Luna Blou lo tin e estreno públiko di e dokumental ‘A Viking in The Tropics, a postcard from Curaçao’. E pelíkula ta trata trabou i bida di e imigrante Nic Møller. Bou di su guia Avila Hotel a krese bira un nòmber establesé ku e ta gosa awendia riba tereno di tantu hospitalidat komo amor pa diferente ekspreshonnan artístiko. Mas ku 50 aña pasá e Danes Nic Møller a pone pia na tera na Kòrsou. El a kuminsá su karera na nos isla komo komersiante di djamanta i a krese te bira e forsa dinámiko tras di e hotèl renombrá Avila na Willemstad. Señor Møller tabata un hende ku pashon pa músika i arte. Den un ambiente kaminda esei no tabata tantu opvio, el a logra hasi e diferensia invertiendo den e hendenan ku e tabata traha kuné. Su amor pa músika i arte a bira e pouta pa su empresa komersial. ‘A Viking in The Tropics’ ta un pelíkula musikal tokante e bida yen i riku di un hòmber ku a namorá di nos isla i luna pasá el a fayesé na edat di 80 aña. El a logra mira e dokumental di Marie Lou Schoenmakers i el a duna su aprobashon n’e.