Despues di hopi anticipacion diaranson awor e di dos Island TakeOver Festival Aruba ta ranca sali. E festival ta start cu e conferencia di tecnologia y innovacion Atech ariba diaranson merdia. Despues ta sigi diahuebs cu e anochi di apertura di e parti musical na Craft. Diabierna anochi dia 1 di November lo ta anochi di concierto cu e.o UB40 ft Ali Campbell & Astro, Sech, Lunay, Alex Sensation, Jeon, Dimelo Flow, Chris Jeday y mas.

Ja for di siman pasa Elite Productions & Entertainment Aruba a cuminsa cu e trabounan logistico riba e tereno di concierto esta Harbor Arena. Por mira cu na e momentonan aki e scenario ta instala hunto cu e vip decknan unda lo ubica e diferente seccionan di mesa. Den e sigiente dianan lo decora e escenario y finalisa e ultimo detayenan pa asina cuminsa cu e diferente chekeo di sonido ariba diahuebs.

Por a compronde cu e benta di carchi ta bayendo hopi bon mes y ta premira di tin un evento cu miles di persona. Por confirma cu tin bishitantenan di Curacao, Colombia, Merca, Hulanda y otro paisnan cu tambe a cumpra nan entrada sea den seccion general, standing vip of mesa. Ainda tin algun carchi na Citgo Blvd, Citgo Essoville, Citgo Palm Beach, Superfood, Fun Miles, Craft y online www.islandtakeover.com Pa loke ta e otro eventonan diabierna y diasabra lo tin e ‘Walking Tours’ tanto na San Nicolas como Oranjestad. Tambe diasabra merdia EF y Partai lo tin e Famoso Pool Party cu dj’s manera Roberto Surace, Abril Love, Vainc, Jean Perez y mas. E pool party ta asesibel pa e personanan cu tin ticket VIP of Mesa. Parti anochi lo tin e Bloc Party den e area di The Village. Esaki ta dilanti Hilton Hotel. E area aki lo wordo sera pa asina bira e localidad di e fiesta. E mesun anochi aki pero mas trempan na Marriott Resort lo tin e ‘Chef’s Takeover Pop Up . Aki chefnan internacional di Peru, Argentina, Aruba y Venezuela lo take over e lobby pa un anochi culinario increibel. Diadomingo lo clausura cu un fiesta na Pelican Pier. Pa e block party y e closing party, e espacio ta limita pa ‘general ticket holders’ y lo wordo ehecuta riba ‘first come, first serve’.

Island TakeOver ta un presentacion di Aruba Tourism Authority, Aruba Trading Company y SETAR NV como patronisadornan y un danki na e partnernan Marriot Hotel, The Ritz Carlton, Holiday Inn , The Mill Resorts, Hyatt Regency Hotel, Aruba Renaissance Hotel, Divi Resorts,  Barcelo, Eagle Resort, Atech , Funmiles, EF, Elite Productions y  Amigo Car Rental.

Pa mas informacion por bishita www.islandtakeover.com of https://www.facebook.com/islandtakeover/