Karnaval 2016 a yega na su final den tur trankilidat.
Djasabra 20 di februari Karnaval di Korsou pa aña 2016 a haña su kulminashon ku 2 aktividat di entregá di premio. Tur 2 aktividat tabata masha bon bishitá i gurponan i nan lidernan enthousiama i kontentu kon tur kos a bai den apenas un luna i mei di selebrashon. Parti atardi a tuma luga entrega di premionan na embahadonan hubenil i tambe gruponan hubenil ku a partisipá na Karnaval 2016. Esaki a tuma lugá na Veneto Casino bou di e Palapa pega ku e pisina. E ambiente krea spesialmenten pa nos muchanan tabata masha ameno i Grupo hubenil di aña 2016 a resultá Grupo Yupi. Prome finalista ta Isla hubenil i di dos finalista a resultá Sweet party kids.
Pa loke ta e entregá di premio pa tiner, kabai i adulto, esaki a tuma lugá na Brakkeput mei mei. Un publiko grandi konsitiendo di lidernan di grupo, partisipantenan di e diferente gruponan i fanatikonan di karnaval a sa di yena Brakkeput mei mei pa presensia e kulminashon di Karnaval 2016.
Na inisio di e programa Presidente di Coridja Stars Productions Sra Corine Djaoen Genaro a hiba palabra i a splika un ke otro pa loke ta e montantenan ku a keda pone disponibel pa premiashon di karnaval 2016. Sra Djaoen a splika ku Coridja Stars Productions ta para pa organsisa karnaval responsabel i pa e parti finasiero tambe ta responsabel i realistiko. Tempu ku varios aña Sra Djaoen tabata presidente di Fudeka, poulatinamente ela bin enkaminá e proseso pa yega na premiashonan mas haltu posibel den karnaval di Kòrsou. Esaki a tum’e sigur algun aña pa por yega na esaki. Despues di tabata ousente pa 3 aña for di organsiashon di Karnvaval, mester a kuminsá ku pone sierto strukturanan bèk pa’sina e desaroyo di karnaval por kontinua. Mirando e realidat finansiero di e organsiashon lo no tabata posibel ni responsabel pa bini ku premiashonnan mas haltu. Importante ta, pa ta kapas pa paga loke primintí. P’esei CSP konsientemente a skohe pa por duna loke sigur por paga i segun aña nan ta bai i e struktura ta bon pone atrobe lo bai na subi e montantenan poulatinamente segun e posibilidat finansiero ta pèrmití.
Despues di e splikashon amplio di Sra Djaoen a toka turno pa minister di Enseñasa. siensia, kultura di deporte Sra Irene Dick a hiba palabra. Sra Dick a felisitá tantu CSP pa e organisashon di Karnaval 2016 i a felisitá gruponan ku a trese un gran espektakulo tantu pa e pueblo din Kòrsou komo esnan ku di afó ku a sigui e transmishonnan riba diferente plataforma.
Despues a sigui ku entregá di rekonosementu na tru spònser, tur organisahson ku kua CSP a traha e temporada akí, na kolaboradonan, na timnan di hurado, na prensa i na tur grupo tantu di Parada di Tiner, Marcha di Kabai i Marcha grandi. Tur e diferente embahadónan di karnaval tantu di tiner komo di adulto a risibí nan diferente premionan. Pa despues pasa pa e premiashonan pa loke ta gruponan mes. Banda di e montantenan di chèk ku e gruponan hubenil i gruponan di Tiner a haña komo premio, nan a risibí di CSP e parti di musika, esta sea nan a bai ku banda òf ku Dj. Nan a risibí tambe transporte pa hiba i trese for d i e marchanan, seguro pa tur partisipante i konsumo parsialmente pa den e marchanan. Pa loke ta gruponan grandi. Banda di e montante di premiashon risibí, tur grupo ku tabatin te ku 100 partisipante a risibí un regalo di fl. 500,–, te ku 300 partisipante fl 750,– i riba 300 partisipante fl. 1000,–.
Banda di e premionan efektivo ku e di dos finalista grupo di aña fl. 750, e promé finalista grupo di aña fl. 1000 i grupo di aña fl. 2000,– nan a risibí tambe 10 kaha di polar. CSP ke yama danki na Gobiernu din Kòrsou, tur e spònsernan i tur esnan ku a kere den CSP pa organisá Karnaval di Kòrsou. Keda pendiente pa un relato finansiero ouditá pa pueblo, gobièrnu i tur spònser por tuma nota di kon nan plakanan invertí a keda usa responsabelmente.