Willemstad – Ya pa basta tempu tantu rebendedó i e públiko kumpradó di biyechi ta pidiendo pa bini ku un kambio den e sistema di sorteonan di e Loteria Nashonal di Kòrsou. Landsloterij a duna oido na e petishon aki, p’esei entrante 1 di yanüari 2019 e skema di premio nobo lo drenta na vigor. Ku e skema di premio sumamente atraktivo aki Landsloterij lo re- introdusí  e lista di premio ku tin tantu  premio yama i derivá. For di dia 6 di desèmber 2018 Landsloterij su biyechi mionario di 1 di yanüari 2019 ku tin komo premio mayó Ang. 1.000.000 lo ta na benta serka tur Landsloterij su rebendedónan. Esaki lo ta alabes e promé biyechi ku lo bai tin e skema di premio nobo aki.

E sorteo ku premionan yama i derivá sigur no ta unu nobo pa Landsloterij. Den pasado e kombinashon aki tabata unu sumamente gustá, pero pa motibunan ekonómiko difísil a pone ku algun aña pasa Landsloterij a tuma medida i a kambia esaki. E re introdukshon di un sorteo kombiná ku premionan yamá i derivá lo trese un oumentu di mas ku 4800 premio èkstra pa aña. E kambio aki sigur lo bai kai den bon tera dor ku e ta duna mas hende chèns di gana  òf manera nan ta bisa den boka di pueblo “libra”.

Un di e kambionan ku ta resaltá ta re introdukshon di premionan derivá for di e lastu kuater, tres òf dos sifra di e promé, segundo i terser premio. Aparte  di esaki e skema di premio nobo tambe lo tin un kantidat  di premio derivá kaminda e delaster sifra ta diferenshá for di e promé, segundo i terser premio. Ku e premio aki banda di e proksimashonnan,  tur number di biyechi ku ta den  e seri di e number ganadó di e promé, di dos òf di tres premio tambe ta ganadó.   

Un otro kambio sumamente interesante ta e oumento den kantidat di  sorteo special di 1 mion florin i mei mion florin. E skema di premio nobo konosé 4 sorteo di 1 mion florin i 7 sorteo di mei mion florin. Den aña 2019 lo tin 11 sorteo chikí di ANG 200,000.

Por último e skema di premio nobo tambe lo mira un ahuste di e montante di e proksimashonnan i tambe un ahuste den e kantidat di premionan di Ang. 500,-Ang. 750,- i Ang. 1000,-

Riba e promé dia di aña un persona di  Kòrsou, Aruba, Bonaire, Sint Maarten, Saba òf Sint Eustatius lo ta felis ganadó di e premio gordo di un mion florin òf e segundo premio i terser premio di respektivamente Ang. 200.000,- i Ang. 100.000,- mas un gran kantidat di otro premionan efektivo ku e skema di premio nobo lo trese kuné.  Landsloterij kier a hasi uso di e oportunidat pa gradisí henter e pueblo kumpradó di Biyechi pero tambe tur rebendedó pa e sosten duna na e skema di premio ku Landsloterij a bende durante e último añanan, i  ta konta ku  nan sosten tambe pa ku e skema di premio nobo.