Despues di 7 aña Melania v.d Veen bèk na Radio

WILLEMSTAD.- Melania van der Veen no ta un deskonosí den mundu di radiodifushon. Den pasado Melania a yega di traha na Radio Hit 110.3, Radio Kòrsou FM i na komienso di Radio MAS e tabata presentadó di su programa di farándula. Na aña 2007 Melania a stòp ku radio i a sigui den e mundu di notisia farandulero te ku aktualmente e ta trahando na korant Vigilante.

E tei bek

Entrante 2 di sèptèmber próksimo Melania lo kuminsá ku un programa na TCFM 93.3FM. For di djaluna te ku djabièrnè, tur atardi di 6’or pa 8’or di anochi lo e presentá e programa ‘Atardi dushi ku Melania. Bo por sigui e programa na radio i riba TDS, kanal 26. Durante di e programa aki lo e presentá un selekshon di kansionnan hit di oro di tur tempu, músika aktual i naturalmente e kansionnan dushi ku bo gusta, pero ku no ta tur ora bo ta skucha. Informashon i moveshonnan den farándula lokal i internashonal tambe lo forma parti dje programa pa bo relahá bo mente despues di un dia di trabou. Pa manda bo informashon di farándula, sugerensia pa Melania bo por hasi esaki via di su página di facebook: ‘Atardi dushi ku Melania’, via email na:  atardidushi-93@gmail.com i tambe via telefon yamando 461-5933 òf 9330. Djaluna, 2 di sèptèmber… ‘Atardi dushi ku Melania’ na TeleCuracaoFM.