Willemstad- 19 di Desèmber 2017- Un i tur ku ta trafiká riba Emancipatie Boulevard Dominico F. “Don” Martina por tuma nota ku e trabounan riba e entrada di e Zona Ekonómiko na Koningsplein ta kedando kla.  Prinispalmente anochi e entrada ta lusi manera un joya, simbolisando un era nobo pa nos zona ekonómiko i nos komunidat.  E entrada renobá ta forma parti di e esfuersonan hasí den 2016 dor di Curinde pa mehorá e kalidat di infrastruktura i seguridat den nos zonanan ekonómiko.  Den e mesun kuadro aki, mas trempan den aña, a inougurá e foodcourt agradabel den e Zona Ekonómiko na Koningsplein.   Pronto, tantu esnan ku tin empresa òf ta laborá, i bishitantenan di Zona Ekonòmiko Koningsplein, lo por hasi uso di e entrada nobo aki.

Mehorashon di e infrastruktura i prinsipalememte seguridat ta un eksigènsha importante den e mundu awendia.  Banda di esaki, estudio ku Curinde a laga hasi, a demonstrá ku empresarionan ku negoshi den zonanan ekonómiko den region, ta duna importansha na un luga di operá sigur.  Curinde mas aleu, banda di invertí den e infrastruktura, ta propagando kompra i esablesimentu den nos zona.  Na mes momentu ta hasiendo esfuerso, den koperashon ku su partnernan, pa mehorá e klima di hasi negoshi for di nos zona ekonómiko.  Asina den 2016 a merkadeá, tantu online riba www.boutiqueofthecaribbean.com komo atraves di medionan konvenshonal manera radio i korant, e loke nos parkenan ta ofresé den e paisnan kaminda tin mas hende sa bin bishitá nos zona ekonómiko pa hasi kompra.  Na mes momentu a kore spot den programashon riba kabel na Latino Amerika i hiba un kampaña online pa atrae hendenan bin establesé den nos zona ekonómiko.  Curinde di e forma aki a bin i lo sigui traha dirigí pa krea un mas i mihó produkto pa ofresé su klientenan.

E diseño di e entrada nobo di Curinde tabata den man di Bouwteam Building Consultants, Prime Structural Engineers N.V. tabata na enkargo di e konstrukshon, e material di staal a keda entregá dor di Van Sluisveld Steel Projects B.V., trabou di elèktra tabata den man di Installatie bedrijf U. Faneijte mientras ku e kontratista tabata Elisur Construction B.V.   E trabou di konstrukshon di e entrada nobo di Zona Ekonòmiko Koningsplein a tuma 4 luna pa keda kompletá.

E entrada renobá, despues di mas di 30 aña, ta respirá e kordial bon biní ku ta pas den e forma ku Curinde ke yama esnan ku ta bishitá nos zona ekonómiko na Koningsplein bon biní.

Finalmente Curinde ta gradisí akshonista i miembronan di Hunta di Komisario pa e konfiansa den e kompania i ta sigui konta riba nan sostén den futuro.