Djadumingu próksimo, Kòrsou lo tuma despedida di un gran baluarte musikal di último 50 añanan, ku ta Maestro  Errol  el Toro Colina. Mundu farandulero e keda di shòk, ounke ku tur hende ta konsiente, ku Toro tabata sinti su kebrante di salu, de bes en kuando. Direktiva di Amak ta apresiá e forma ku músikonan, artistanan, personal di Servisio di Kultura, Kas di Kultura, kier uni forsa pa duna Toro un digno despedida musikal. Huntu ku Consolador i e instansianan ya menshoná ta bai krea un espasio kubri, dilanti e stage grandi den Festival Center, pa tur esnan ku ta deseá por pasa tuma despedida di Toro Colina. E públiko por drenta na e entrada di Red Carpet i nan ta ser dirigí pa e hostessnan presente. Ta kuminsá risibí kondolensia for di 11’or di mainta i lo tin sufisiente stul pa sinta bou di e tèntnan pa esnan ku ta keda pa e homenahe  i demas seremonianan. Danki na e  koperashon di Licores Maduro, General Catering, Franky’s Chair and Table Renting, Massive Productions, Coca Cola, Servisio di Kultura, Kas di Kultura, Amak i Festival Center, músikonan di Orkesta Nashonal i Junior All Star Orchestra, a bira posibel, pa duna Toro Colina, un despedida digno, manera e meresé.

E programa di djadumingu 9 di ougùstùs  2015 ta lo siguiente:

11:00 – 11:05                 Palabra di Apertura MC

11:05 – 11:10                 Himno di Kòrsou

(no ta usual pa kanta Himno na seremonia di entiero, den e kaso aki ta hasié tòg pa e aporte ku Toro a duna 30 aña komo dirigente di orkesta riba dia di Bandera i tambe e echo ku e la areglá nos Himno di Kòrsou)

11:10 – 11:20                 Intervenshon musikal  (2 piesa Orkesta Grandi)

11:20 – 11:25                 Palabra di sr. Gregory Colina

11:25 – 11:30                 Palabra di sr. Gedion Chandler

11:30 – 11:35                 Intervenshon musikal ( 1 piesa Orkesta Grandi)

11:35 – 11:40                 Palabra di sr. Fecco Gomes (Presidente di AMAK)

11:40 – 11:50                 Intervenshon musikal (2 piesa Orkesta Grandi)

11:50 – 11:55                 Palabra di sra. Irene Dick (Minister di Enseñansa, Siensia , Kultura i Deporte

11:55 – 12:00                 Palabra di sr. Ivar Asjes (Minister President)

12:00 – 12:20                 Intervenshon Musikal (5 piesa Orkesta Grandi)

12:20 – 12:55                 Intervenshon musikal (9 piesa Junior All Stars Orchestra)

12:55 – 13:00                 Voice di Toro Colina (un grabashon ku tin)

13:00 – 15:00                 Ta risibí bishita di kondolensia (músika den background)

15:00 – 15:30                 Respòns ouspisiá pa pastor Raul

15:30 – 16:00                 Palabra  na nòmber  di famia

16:00                            Ta hisa e kaha morto E  trompetistanan supla un Last Post ora ku ta sali ku e kaha. E trompetistanan ta para na banda miéntras e kaha ta pasa mei mei di nan.

16.10                              Salida di e korteho funebre pa Santana katóliko na Janwe Nota: riba screen ta pasa un kompilashon di potrèt i grabashon di Toro.