ORANJESTAD, Aruba – November 2015: Ennia ta hopi contento cu e organisadonan di Beach Tennis Aruba Open 2015 cu a tuma luga na Eagle Beach. Aruba tin atencion completo di hungadonan di beach tennis internacionalmente y ta conta cu participacion di hungadonan di paisnan di practicamente tur continente. E hungadonan Arubano ta dunando un tremendo presentacion tambe.

Sulaika Briezen, representante di mercadeo di Ennia a splica cu e compania di seguro ta satisfecho cu e acogida cu e torneo a haya. Ennia a dicidi di patrocina e campeonato aki como parti di su esfuersonan pa duna bek na comunidad y nan clientenan, cu apoyo di un evento cu ta yuda promove Aruba su nomber den exterior, tanto como destinacion pa hunga Beach Tennis, como un destinacion turistico.

Ennia ta hopi orguyoso di nan participacion como un sponsor principal di e evento y ta posibel cu nan lo apoya e evento aki otro aña tambe, segun Briezen. Esaki ta un otro contribucion mas di Ennia na deporte y un estilo di bida saludabel, realisa pa medio di nan sosten cu Beach Tennis Aruba.