En conexion cu celebracion di e gran apertura di e Main Street Express Branch, Aruba Bank ta regala su clientenan premionan cash, pa haci uzo di nan servicionan nobo.

E demanda di e clientenan di awendia pa facilidadnan cu ta contene servicio innovativo y cu ta brinda e cliente loke e mester den un tempo mas cortico, ta creciendo. En conexion cu e demanda grandi aki, a dicidi di introduci un facilidad cu lo brinda e cliente locual e ta desea.

E proyecto, cu ta e prome concepto di “self-service banking” na Aruba, lo brinda servicionan bancario completamente modernisa, cu ta facilita transaccionnan den forma automatisa.

Pa esey, Aruba Bank ta duna premionan cash, na su clientenan, manera e prome cliente cu a haci uzo di Express Loans. Tambe nan a saca entre e clientenan nobo un ganado, como tambe a scoge un ganado entre clientenan cu a haci uzo di nan sistema di ATM.

Aruba Bank ta mira e balor di mantene su presencia den centro di Oranjestad cu servicio facil y rapido pa esunnan cu ta traha y biba den cercania. Nan ta mira un corelacion entre mantene presencia y ta exitoso den locual cu nan ta ofrece. Aparte di mantene e presencia historico di Aruba Bank den centro di nos ciudad, e proyecto lo sigui conta cu su parkeerplaats pa acomoda clientenan cu ta bishita e sucursal como tambe aporta na e infrastructura fresco y moderno di nos caya principal.

E sucursal aki di Aruba Bank ta e prome sucursal cu lo brinda posibilidadnan bancario rapido, facil y conviniente pa e bida rapido di  clientenan y  lo sigui ofrece servicio na henter e sector comercial den cercania.