Ganador di CYEA 2015 a risibí un chèk di 10,000 florin di Banco di Caribe
WILLEMSTAD;- E ganador di Business Development and Recognition Program “CYEA 2015”organisá pa JCI IOBA Curaçao i Banco di Caribe ta konosí. Na e anochi di premiashon di e empresario hóben mas kreativo di Kòrsou a premia Ana Freitas-Frias ku e empresa Tatiana’s Dream komo e ganador di The Creative Young Entrepreneur Award 2015. Den e kategoria di empresario aspirante yòn y kreativo “ ACYEA” e ganador apsoluto a resultá Andrew Kirchner ku su konsepto di empresa 2ndLife Curaçao.
E selebrashon ku a tuma lugá riba dia 30 di yüni na Curaçao Marriott Beach Resort & Emerald Casino tabata un éksito i ta klousurá e programa Creative Young Entrepreneur Award (CYEA) 2015 “Crafting your Business”. E programa di CYEA ta pa rekonosé, honrá i selebrá empresarionan eksepshonal, i e ròl di kreatividat den nan éksito. Alabes otro meta di e programa di CYEA ta pa yuda desaroyá nos ekonomia dor di kultivá ‘entrepreneurship’. Tur partisipante a haña un “goody bag” na balor di Naf. 1500,- ku ta inkluí dos luna grátis di uso di e ofisina flèksibel di Startup Curaçao Workspot, un seshon di guia “Brand Connection” di The Business Connection BV pa krea balansa entre konsepto i strategia pa “brand” e negoshi i un seshon di guia pa maneho di Grátida Management Services pa asina organisá e proseso di negoshi mihó.
E ganador apsoluto di CYEA 2015 a risibí un pakete di premio total na balor di alrededor di NAfl. 27000,- di kual entre otro un chèk di 10,000 florin di Banco di Caribe, e patrosinador prinsipal di e programa. Ademas di esaki, e ganador a risibí un produkshon komersial di The Jingle Planet. E ganador di ACYEA tambe a risibí un pakete di premio di alrededor di NAfl. 17.000. Banda di un premio di NAfl. 2000,- riba un multicard di Banco di Caribe, e’la risibí tambe pago di e kostonan pa por lanta un ‘vennoot’ di e ofisina di notario Burgers & Fung A-Loi.
Ámbos ganador apsoluto ta haña un trayekto di Business Boost komo un di e premionan ku CITI a otorgá, esaki komo guia pa e aktividatnan di eksportashon i strategia di negoshi. E ganadónan a bai kas ku un seguro di biahe pa empresario di ENNIA tambe. E tòp 3 ganadornan den tur dos kategoria a gana un ‘financial check-up’ di OGS Financial Advisors. Robert Hieroms (Curitur BV) i Magfried Janga a bira promé i segundo finalista di ACYEA 2015. Den e kategoria di empresario ya eksistente CYEA 2015 e promé i segundo finalista a resultá Brenda Koek (Max & Bee Juicery) i Rojulenne Celestina (Delicious).
E premiashon di e empresario hóben di mas kreativo di 2015 a wòrdu skohé entre: It’s Yummy, Delicious, Tatiana’s Dream, Piece Of Heaven, Rozzetti, MAX &BEE, Travelicious, JenPen Creative Studio i Parazoa. E nominadonan pa ACYEA 2015, empresanan aspirante ta Sedusí chocolatier, Curitur BV, Museo di Mucha, Caribbean Back Office Services (CBOS), The Cross road, 2ndLife Curaçao, Route Guider i Rey X. Pa mas informashon tokante CYEA 2015 bishita www.iobacyea.com òf bishitá e página di facebook di JCI IOBA Curaçao.