Willemstad — Empleadonan di EY (Ernst & Young) Curaçao por medio di e fundashon EY Cares Foundation, ta alegrá kurason di varios mucha anualmente ku un gesto uníko.  Djaweps atardi, 15 di desèmber,  34 mucha a haña un chèns pa eksperiensá un atardi di kompra na un pakus di paña situa den Sambil ku yama EPK. E muchanan por a skohe nan propio pañanan.

E temporada di pasku ta un temporada kaminda hopi hende ta sorpresá nan ser kerí ku un gesto speshal. Alabes tin hopi famia ku no tin moda di partisipá di e forma aki na e selebrashon di dianan di fiesta. Pesei empleadonan di EY ta otorgá anualmente na algun mucha ku menos rekurso e oportunidat di sinti nan tambe parti di e selebrashon. E muchanan di Stichting Felis a keda sorprendí i hopi kontentu ku e gesto. Empleadonan di EY a gosa di por a shòp ku e muchanan i tambe a pasa un atardi ameno huntu ku nan den e parke di trampolin, Zero Gravity.

EY su kompromiso ku komunidat ta para sentral hinter aña. E aña aki EY Cares Foundation a organisá e di tres Curaçao Color Walk huntu ku JCI Dutch Caribbean, kual a kolekshoná mas ku fl 130.000 pa Fundashon Formashon Awe Progreso Mañan, Fundashon Guia Eduká y Forma, Fundashon Konstruyendo Un Mihó Kòrsou i Ronald McDonald House Charities. Den òktober tabatin EY Connect day, un dia di deporte i nutrishon ku muchanan di Van Houte School i  EY Cares Foundation ta será e aña aki bon un biaha mas dunando bèk na nos komunidat ku e proyekto ‘EY Christmas giving’.