“Komo yu di Kòrsou i komo Parlamentario, sr. Gerrit Schotte tin mantenshon di empleo pa tur esnan enbolbí na pechu i den e kaso aki e lo hasi tur kos ku ta na su alkanse pa DAE keda un kompania aereo viable i ku futuro i pa niun kupo di trabou no bai pèrdí.” 

Awe den oranan di mainta un delegashon di trahadornan di DAE ku tabata akompañá pa un gran mayoria di e demas personal di e kompania aereo, a

ofresé Parlamentario di MFK sr. Gerrit Schotte un petishon ku e wòrdu firmá  dor di e forsa laboral di e kompania, den kual ta pidi sr. Gerrit Schotte intermediashon pa sali na vanguardia di DAE i sigurá nan kuponan di trabou. Djamars 11 di yüni awor ta hasi éksaktamente 4 siman ku avionnan di DAE no por bula pa Venezuela dor di medidanan di suspenshon tumá pa INAC. Empleadonan di e kompania aereo ta indiká den nan karta ku gobièrnu enbes ku gobièrnu a sali na nan defensa, gobièrnu a indiká ku ta un problema di DAE i INAC. E empleadonan ta sinti nan mes desampará dor di gobièrnu.

Pa e motibu aki, e empleadonan di DAE a aserká sr. Schotte pa intermediá i hasi lo posibel pa sali na vanguardia di e empresa i pues sigurá nan pan. Sr. Schotte mesora a manda un karta ofisial pa Minister ku ta enkargá ku e kartera di aviashon sr. E. Baldborda i a indiká ku 
komo yu di Kòrsou i komo Parlamentario, e tin mantenshon di empleo pa tur esnan enbolbí na pechu i den e kaso aki e lo hasi tur kos ku ta na su alkanse pa DAE keda un kompania aereo viable i ku futuro i pa niun kupo di trabou no bai pèrdí. Huntu ku esaki teniendo na kwenta tambe ku e aporte balioso ku DAE ta duna nos turismo i hotèlnan na ekonomia di Kòrsou i tambe na nos balansa di pago.

Parlamentario sr. Gerrit Schotte ta tèrminá su karta dirigí na Minister Balborda ku algun pregunta relashoná ku e situashon di DAE i ta konta riba kontestashon mas pronto ku ta posibel riba e preguntanan.