Willemstad- E alumnonan di Frater Evoniusschool a kuminsá nan aña eskolar nobo den klasnan nèchi di fèrf i un ambiente limpi tantu paden komo pafó danki na e trabou di empleadonan di CIBC FirstCaribbean komo parti di e proyekto di Adopt-A-Cause di CIBC FirstCaribbean di e aña aki.

Empleadonan di e banko, huntu ku algun voluntario, a fèrf e klasnan di Frater Evoniusschool durante un periodo di tres wikent. Nan a kolaborá ku otro pa krea un ambiente ku ta inspirá e muchanan. Algu ku lo hasi e eksperensha di siña mas plasentero. Un danki speshal na AVF Paints i Building Depot pa perkurá pa deskuento riba fèrf i material pa fèrf kuné.

Frater Evoniusschool ta un skol pa mucha ku nesesidat speshal. Alrededor di 85 studiante, den edat di 7 pa 14 aña ta bishita e skol kaminda 15 maestro i asistentenan ta brindá hóbennan un edukashon na midi. E retonan speshal di e muchanan aki ta demanda atenshon speshal i bon konosementu pa atendé ku nan.

Un medio ambiente apropiá ku ta stimulá edukashon ta un mester. Desafortunadamente e skol su fasilidat no ta kompletamente optimal i por usa sigur un mehorashon serio. Ta e nesesidat aki i e saber kon un ambiente adekuá pa formashon por influensha e formashon di e alumnonan aki a motivá e tim di CIBC FirstCaribbean pa dediká nan tempu i esfuerso den fèrf e klasnan.

“Nos ta gradesido na e empleadonan di CIBC FirstCaribbean pa a perkurá pa un bista renobá di nos klasnan. Nos meta ta pa desaroyá nos studiantenan pa nan bira independiente i útil den nos komunidat. Pa e motibu aki un ambiente di skol adekuá ta un mester” e kabes di skol Sra. Solange Kleinmoedig a bisa.

“E kontribushon di CIBC FirstCaribbean definitivamente lo tin un efekto positivo riba nos studiante i dosentenan. Semper bo por logra mas den un ambiente fresku, limpi i atraktivo i asina oumentá e produktividat di e alumnonan. E empleadonan di CIBC FirstCaribbean, berdaderamente komo un tim, a plania i kombertí e klasnan den un ambiente ku ta inspirá pa eduká aden” Kleinmoedig a sigui bisa.

“Tabata un plaser pa nos koleganan di CIBC FirstCaribbean, huntu ku algun boluntario, realisá nos proyekto di Adopt-A-Cause na Frater Evoniusschool. Ku esaki CIBC FirstCaribbean ta suprayá e importansha pa nos muchanan haña edukashon den un ambiente ku ta motivá nan pa nan hasi nan máksimo esfuerso. Nos tim a disfrutá di partisipá den e esfuerso aki enbista ku ela bolbe duna nos e oportunidat pa demonstrá nos kompromiso pa kontribuí i duna balor na nos komunidat” Sra. Lysaira Ortela di CIBC FirstCaribbean a bisa.