WILLEMSTAD- 23 di yüni 2013:- Kòrsou por ta orguyoso di su Emmabrùg (brùg di Ponton) kual a risibí nominashon pa premio ‘’8th Wonder of the World” di VirtualTourist.com. Mas ku 300 monumento rònt mundu ta den kompetensia pa bai ku e titulo máksimo di “8th Wonder of the World”.  

Emmabrùg ta un herensia ku nos por ta hopi orguyoso di dje; konstruí dor di kònsel norteamerikano Leonard Burlington Smith na aña 1888. E ta wòrdu konsiderá un brùg úniko den su sorto na mundu. Un i tur ku bishitá nos sentro di suidat ta keda altamente fasiná na momentu ku e brùg ku ta konektá e dos partinan di Willemstad, Punda i Otrobanda ku otro ta habri pa un boto òf un bapor drenta nos haf. Emmabrùg, Swinging old lady, Pontjesbrug òf brùg di Ponton ta i lo keda un di e instrumentonan vital pa tantu nos haf i nos sentro di suidat.   E aña aki selebrando su di 125 aniversario, nos Emmabrùg a sá di konbertí su mes den e imágen prinsipal pa promové Kòrsou komo destinashon turístiko, internashonalmente. Pa Emmabrùg por konkistá e titulo máksimo den e kompetensia di “8th Wonder of the World”, ta invitá pueblo di Kòrsou pa bishitá e wèpsait di http://www.virtualtourist.com/8thwonder i vota awe mes. Ta bon pa menshoná ku kada persona por vota un bes pa dia i dia 30 di sèptèmber 2013 lo sera e votashon. E monumento ku risibí mas voto no únikamente lo risibí e premio máksimo di “8th Wonder of the World” sino lo paresé tambe den un segmento di un programa di televishon na Merka i lo risibí promoshon masivo via di VirtualTourist.com