WILLEMSTAD – E proseso pa purba bende e edifisio i tereno kaminda Curaçao Marriott Hotèl ta den pleno akshon ainda. No tin niun konvenio ainda entre doño Rif Resort Hotel NV ku un di e dos kandidatonan pa e kompra. Tanten ku esei ta e kaso, no por hasi niun palabrashon ku e empleadonan di e hotèl tokante nan futuro. Esaki a splika nan bon kla ménos ku dos siman pasá.

Riba djaluna un ofisina di abogado a laga pone embargo riba propiedat di Rif Resort na nòmber di un grupo di empleado di hotèl. A base di informashon ku nan lo a optené ku ya tabatin un akuerdo ku un di e kandidatonan, nan a yega na e paso aki. Nan miedu ku ta ta hasi e kompania aki bashí pa despues nos ta sobra nada pa ora mester sera kuenta ku e personal.

Términonan di tempu

Rif Resort ta konsiderá e embargo aki prematuro i e temor no ta basá riba niun echo tampoko. Manera a splika ménos ku dos siman pasá na e personal den un asina yamá townhall meeting i di loke a informá nan abogadonan tambe, e negosiashonnan ku kandidato number 1 ketu bai ta andando. Pa e proseso di benta aki tin un palabrashon hasi di antemano pa loke ta prosedimentu i términonan di tempu na kua tur esnan envolví mester atené. Na e momento aki tur opshon ta habrí ainda, hasta esun ku no por bende e hotèl.

Hustamente na interes di e proseso sensibel di negosiashon tur partido envolví den esaki a komprometé den un asina yamá nonm-disclosure agreement pa no divulgá nada di e proseso tanten ku e negosiashonnan ta ‘den. Den e enkuentro ku e personal repetidamente a splika ku si yega na un akuerdo i ku tin un klousura (temporal) den tapara, Rif Resort su intenshon ta pa informá e personal komo promé di esaki i eventualmente pa presentá un plan di retiro. Sinembargo, ainda no a yega asina leu di moda ku mester denominá tur otro deklarashon i paso na e momento aki komo prematuro.