WILLEMSTAD – Sèptèmber último tabata e grandioso dia riba kua a saka e ganador apsoluto di The Golden Voice of Tourism Youth Congress 2015.
Curaçao Tourist Board (CTB) i tambe JCI United Citizens of Curaçao (JCIUC) ta hopi orguyoso di kada un partisipante ku a sa di demostrá nan kapasidat di pone tur loke nan a risibí durante e periodo di preparashon den práktika. Promé ku e anochi final partisipantenan a forma parti di dos diferente buèlta. Den e promé seshon a trata e tópiko di turismo i medio ambiente i tambe promoshon di turismo pa medio di audio visual. Pa loke ta trata e siguiente ròndu hóben partisipantenan a presentá i elaborá riba e tema di trabou boluntario den turismo i diskutí riba un tópiko misterioso. Despues di un tremendo presentashon miembronan di hurado tabata tin sigur un trabou difísil pa tuma un desishon di ken lo bira e dos finalistanan ku ta klasifiká i kontinuá pa e anochi final.
La Tentashon tabata e sitio durante e anochinan preliminar i final kaminda famia, amigu, i komunidat kompletu por a presensiá e diferente panel di diskushon. Pa loke ta trata e parti di premiashon kada hóben a risibí meresidamente un medaya I tambe un regalo pa disfrutá di Aquafari komo apresio di nan partisipashon. Mas ku klaro ku e damita di 17 aña Johannah Rosaria kende ta esun ku a bai ku e titulo máksimo a risibí adishonal su medaya di kampion di e promé edishon di The Golden Voice of Tourism Youth Congress. Na final di e anochi direktor interino di CTB, sr. Clarinda a hiba palabra na e partisipantenan i tur presente.
Na pueblo di Kòrsou kompletu CTB i JCIUC ta hopi gradesí pa boso sosten durante e tempu di preparashon i kompetensha pa por a yega na nos Embahador di Turismo 2015. Johannah ta bai representá nos dushi isla den Karibe dia 23 di òktober 2015 den Caribbean Tourism Youth Congress. Pues trabou duru ta bai kontinuá pa asina prepará nos representante debidamente. Nos tin sigur ku Kòrsou por ta satisfecho ku e resultado i ku nos lo ta bon representá durante e kompetensha regional.
Pa mas informashon por bishitáwww.facebook.com/uccuracaoòfwww.facebook.com/Dushihende. Por manda un email tambe na goldenvoicetourism@gmail.com.