WILLEMSTAD- 19 di yanüari 2014 – Na fin di desèmber 2013 Ofisina di Turismo di Kòrsou (CTB), Curaçao Ports Authority (CPA) i Ministerio di Desaroyo Ekonómiko (MEO) a lansa e kompetensia “Saka potrèt di nos brùg Emma”. E kompetensia a keda lansa ofisialmente dor di Minister enkargá ku Desaroyo Ekonómiko, sr. Stanley Palm. For di un total di 65 potrèt ku a kumpli ku e reglanan stipulá, a skohe e potrèt di sr. Elton Raven komo esun ganador. E kompetensia tabatin dos meta prinsipal; yega na un imágen bunita di nos brùg Emma ku por keda usá den kampañanan di merkadeo kordiná pa CTB i tambe atraé nos hendenan lokal pa bishitá nos sentro di siudat i atmirá brùg Emma. E metanan stipulá sigur a keda alkansá mirando ku e potrètnan risibí tur ta mustra e beyesa di nos brùg flotante  saká for di diferente  ángulo. E komishon di hurado forma pa un representante di CTB, un representante di CPA i 2 fotógrafo profeshonal a skohe e potrèt ku ademas di a kumpli ku tur e reglanan stipulá, a resaltá mas. Tabata un trabou hopi difísil mirando e kantidat di potrètnan bunita ku a risibí. E foto ganadó ta mustra brùg Emma dòrna na lus huntu ku nos Handelskade ku sigur ta un marka ku kual nos ta identifiká nos pais Kòrsou. Ta bon pa menshoná ku nos brùg Emma na novèmber último a resultá den e tòp 10 di e kompetensia di ‘The 8^th Wonder of the World’. CTB, CPA i MEO ta felisitá sr. Elton Raven ku e potrèt eksepshonal di nos brùg Emma ku sin duda lo ta e sentro di atenshon den kampañanan di merkadeo kordiná pa CTB. Komo premio sr. Raven a risibí un montante di Naf. 2.500,00. Entrega di e premio a keda hasi dor di Minister enkargá ku   Desaroyo Ekonómiko sr. Stanley Palm. Un danki spesial ta bai na tur ku a partisipá den e kompetensia aki.