Un konsierto kaminda nos ta bai selebrá nos herensia musikal i yama danki na tur esnan ku a bai nos dilanti lagando tesoronan kultural atras.

WILLEMSTAD: Manera ta kustumber pueblo di Kòrsou tin e plaser di disfruta di un evento musikal den e dianan di fiesta durante fin di aña. E aña aki lo no ta un eksepshon. E evento musikal  ta karga e nòmber di ‘Thnxgiving Concert” i wòrdu di sponsor pa El Tributo.

El Tributo ta yama danki ku “Thnxgiving Concert”. Paso musika ta esensial den hopi di nos su bida. Nos ta skucha musika ora ku nos lanta for di soño, den trafiko, na trabou i huntu ku nos sernan kerí. Esaki por trese felisidat i motivá nos, pero tambe kompañá nos den momentu difisil i alivia nos preokupashonnan. Musika no ta toka nos solamente na un manera intelektual, sosial òf emoshonal, pero tambe na un manera spiritual. Ta netamente esei El Tributo ke brindá pueblo di Kòrsou.

“Thnxgiving Concert” lo tuma lugá djadumingu 26 di novèmber proksimo, for di 10or di mainta te ku 12or di mèrdia, aya na Morada Santa Bottelier. Un konsierto kaminda artistanan di taya ta bai deleita un i tur presente ku dushi musika. Ku aktuashon estelar di Randal Corsen & Friends, Kris Berry, Jean-Jacques Rojer, Dibo Doran i doña Mafalda Minguel. Entrada lo ta kompletamente gratis.

Bin selebrá bo herensia musikal i yama danki na tur esnan ku a bai nos dilanti lagando tesoronan kultural atras.