Feria di Industrianan lokal

Mijnmaatschappij Curaçao, ku ta un di e promé kompanianan industrial di Kòrsou, ta selebrá e echo ku 145 aña pasá a lanta e empresa aki riba nos isla. Pa konmemorá e okashon aki, nan ta tene un tremendo Feria estilo Ban Topa, kombiná ku un eksposishon di produktonan trahá na Kòrsou. Pa esaki nan a uni forsa ku Curaçao Manufacturers Association, ku ta e asosiashon nobo ku ta representá fabrikanan di Kòrsou i Ministerio di Desaroyo Ekonómiko. E eksposishon ta tuma lugá e fin di siman aki, riba djasabra ku djaduminu na e ‘Old Village’ na Porta Blanku.

Asosiashon di Fabrikantenan di Kòrsou (CMA) a disidí di hasi bon uso di e oportunidat aki pa yama atenshon riba produktonan di Kòrsou. Fabrikanan lokal ta sòru pa mas ku 900 kupo di trabou. Sigur den e tempunan aki ku tin diferente hende ta pèrde trabou, ta mas importante ku nunka pa apoyá nos fabrikanan lokal. Presidente di e asosiashon di fabrikanan lokal ta sr. Horace Hinds, ku ta alabés Direktor General di Antilliaanse Verffabriek. Manera e ta splika “kada bia ku nos kumpra un produkto lokal, nos ta yuda sigurá trabou di un yu di Kòrsou”.

Pero no ta unikamente ‘empleo’ e fabrikanan ta sòru pe. Kada bia ku nos fabrikanan eksportá nan produktonan, nan ta sòru pa generá devisa pa nos pais. Esaki ta un di e motibunan ku Ministerio di Asuntunan Ekonómiko (MEO) ta apoyá sektor industrial i a disidí pa uni forsa den organisashon di e eksposishon di produkto lokal. MEO tambe ta enfatisá balor di produkshon lokal i pa e motibu aki ta hasi hopi esfuerso pa yuda desaroyá nos sektor produktivo. P’esaki e ministerio ta trahando entre otro riba un maneho industrial ku lo sòru pa lèinan i regulashonnan adekuá pa realisá un industrialisashon modèrno ku ta hasi uso di tur e avansenan teknológiko ku tin nan nos alkanse awendia.

Durante e ‘Expo Produkto Lokal’ lo duna demonstrashon di e diferente produktonan i kon ta traha nan. Diferente di e trahadónan industrial lo tei presente pa mustra kon e produkshon ta sosodé. Tambe lo tin oportunidat pa públiko purba i kumpra diferente di e produktonan.

E evento ta bai bira un enkuentro plasentero ku atenshon pa famia. Lo tin diferente aktividat pa mucha, manera bouncer, glijbaan, aktividat di arte i obra di man pa mucha, kids science club, tour den Mijnmaatschappij mes i demonstrashonnan di e fabrikanan. E feria ta kuminsá for di 9:00 or di mainta te 3:00 di atardi i ta tuma lugá riba Djasabra 18 i Djadumingu 19 di Mei. Entrada ta kompletamente gratis.

Tur hende ta invitá pa bin selebrá 145 aña Mijnmaatschappij huntu ku Ministerio di Desaroyo Ekonómiko i nos fabrikanan lokal.