Willemstad- Yüni 2013: E di 5 edishon di Creative Young Entrepreneur Award ku JCI IOBA Curaçao hunto ku Banco di Caribe ta organisá lo kulminá dia 6 di yüni 2013. E tema di CYEA 2013 e aña akí tabata: “Business Excellence – Unleash the Creativity in you”. Loke e komishon di CYEA 2013 ke logra e aña akí ta pa alsa e abilidatnan empresarial di e empresario hóben i yuda e partisipantenan individual bira mas konosí den e komunidat di Kòrsou.

E partisipantenan di e aña aki ta; Stephany Fransisca di Beterzorg B.V, Veronique Toulon di Cherie’s, Tatiana Saturnino-Felix di Tera Percussions, Renato Ignacio di Minubia, Tiffany Cristina di Kinderopvang Arko di Iris & Rainbow Unique, Shamiro Anita di CFS Solution,Valerie Diemont di Mastermind Coworking, Melinda Domacasse di Caribbean Holistic Institute, John Pandt di Think Bright, Gino Jacobs di Skempi i Merelyn Remak di GlitzCupcakes.

Tur partisipante a sigui kursonan obligatorio en konekshon ku e programa ku a tuma lugá dia 9 di mei na ofisina di Ernst & Young situá na Zeelandia Office Park. E kursonan ku e partisipantenan a sigui tabata:

• “Creating a Breakthrough for your new business” – Insight from a not-so- young Entrepreneur ku Sra. Ruvette Dirksz a duna di e kompania GRATE Group Public Relations & Marketing
• Strategy & Innovation ku Sr. Enrico Lai a duna di e kompania Up to Date B.V.
• Presentation Skills ku Sra. Roxanne Larmonie a duna di e kompania Hero Media Consulting & Planning
• Impuesto pa impresarionan ku Sra. Melissa Haseth a duna di e kompania Ernst & Young

E meta final di e dia di kurso tabata pa siña e empresarionan hóben kon nan por evaluá i mehorá nan empresa pa por kontinuá eksitosamente den futuro. Despues di e dia di kurso obligatorio akí, e partisipantenan tabata kla pa sigui e siguiente paso pa nan por demonstrá di kon nan meresé e título di Creative Young Entrepreneur 2013 i tambe e premio grandi di  FL10,000 opsekiá pa Banco di Caribe. E dia di kompetensia a tuma lugá dia 15 di mei na Teatro Luna Blou. E 11 partisipantenan mester a presentá nan kompania i demostrá nan kreatividat den nan kompania dilanti 3 hurado. E tres huradonan di CYEA 2013 tabata Sra. Jachmin Pinedo (direktora di Radio Direct 107 fm i Life92 fm), Sra. Germain Mau Asam (Sr. Manager Corporate Credits di Banco di Caribe) i Sr. Javier Samson (direktor di Innovatiecentrum Curaçao). Durante e dia di kompetensia e ekipo di Sigui5.com ku tambe ta un di e spònsernan a filma tur presentashon di e 11 partisipantenan. Un kompilashon di e dia di e kompetensia lo pasa na TeleCuraçao  pa e pueblo di Kòrsou por sera konosí ku tur partisipante  di e proyekto Creative Young Entrepreneur Award 2013. E seremonia di entrega di premio lo tuma lugá 6 di yüni próksimo den Tula Room na Kurá Hulanda. Riba e anochi aki lo revelá e tres finalistanan i tambe e empresario hóben mas kreativo i esun ku a duna mas impakto i a sá di optené esaki ku introdukshon di un produkto òf servisio den nos merkado. Banco di Caribe lo entregá e premio grandi di FL 10,000,00 na e ganador(a) pa e persona akí invertí den su empresa. E seremonia di entrega ta tuma lugá, dia 6 di yüni próksimo na Tula Room, Kura Hulanda kuminsando 8’or di anochi. Lugánan ta limitá pa e seremonia i ta p’esei mester registrá riba e wèpsait www.iobacyea.com/registration. Tur persona ku registrá lo haña un konfirmashon via e-mail ku nan a registrá pa e seremonia.