Willemstad – E ruta di estatua na Blue Bay Golf & Beach Resort, dia 26 di September a keda ekspande ku dos eskultura monumental di Brigitte Wawoe . E Pegasus (wak foto) i e Djaka di Kaña (Eenhoorn). Un Totem di Ellen Spikstra a keda poné kaba for di dia 26 di april. E ruta di estatua na Blue Bay ta e prome parti di e proyekto pa krea un parke di estatua na e resort aki. Ta trata aki di un proyekto uniko destina pa laga turista, hungadornan di golf i huespetnan di e Resort, habitantenan di nos pais, partikularmente nos hubentut ku ta na skol, sera konosi ku e nivel haltu di e arte di eskultura ku Korsou ta posee.
E ruta di estatua na Blue Bay kaminda ademas prome ku fin di e aña aki lo tin shete (7) eskultura adishonal, lo bai kondusi pa e hardin di estatua ku lo surgi dilanti di Landhuis Blaauw. Tur e obhetonan aki lo keda poné den harmonia ku e naturalesa eksistente na Blue Bay. Na e momentonan aki, Avatia Damberg i Rien te Hennepe ta trahando riba nan eskulturanan na e resort pa e exposishon permanente. Naturalmente ta posibel pa presensia parti di nan trabao, anunsiando esaki serka seguridat na e entrada di Blue Bay. E fundashon Hardin di Estatua di Blue Bay ta spera ainda ku prome ku fin di e aña aki lo por dispone di e trabaounan di Herman van Bergen i Yubi Kirindongo.
Den luna di September ultimo e direktiva di e fundashon a keda reforsá ku dos miembro nobo, di manera ku e konstelashon aktual ta:
- Jan Gulmans, Presidente
- Freddy Curiel, Tesorero
- Sepp Koster, Sekretario
- Ellen Spijkstra, aasuntonan artístiko
- Ingenie Dammers, Relashon Publiko enkargado pa buska fondo
E fundashon Hardin di Estatua di Blue Bay ta masha agradesido pa e patrosino i donashonan ku nan a risibi di Prins Bernard Cultuurfonds Caribisch Gebied (PBCCG), diferente empresa i personanan di e sosiedeat kurasoleño i esun hulandes. Nan sosten ta hasi posibel ku e obhetonan tri-dimenshonal por keda presenta di e area presioso aki i riba un forma ku defitivamente ta duna e turismo di Korsou un impulso konsiderabel. Pa mas informashon riba e artistanan, nan obhetonan i patrosinadornan por konsulta ku ewebsite:
http://www.stichtingbeeldentuinbluebay.com