… Jiwiri peuterschool i naschoolsche opvang na Amboina a haña atenshon spesial…

KRALENDIJK-SEPT; E fin di siman tras di lomba Digicel a tene su terser ‘Bario Ekstraordinario’, e biaha aki ku atenshon spesial den e bario di Amboina. E tim di Digicel a limpia e kurá di skol i dun’é un kara nobo; a fèrf un parti di e edifisio i área di rekreo. Gerensia di e skol a keda mashá kontentu ku e gesto di Digicel i e bario di Amboina tambe a demostrá gratitut dor di a akudí pa sostené e proyekto. Jiwiri peuterschool i naschoolsche opvang ta kumpli 29 aña fin di sèptèmber benidero, esaki mes ta e motibu pa kual Digicel a hasi e skol nan proyekto pa e ‘Bario Ekstraordinario’ di e luna aki. “Ta di apresiá ku pa 29 aña largu a mantené e skol aki den funshon. Ta sigur ku hopi mucha, awòki hóben adulto tin grato rekuerdo di nan infansia. E ta un kombinashon di elementonan manera tradishon, konsistensha, perseveransia, amor i kuido pa mucha ku ta hasi posibel pa durante 29 aña drei e skol, esaki nos ta apresiá”, di akuerdo ku Irvinia Daantje, relashonista públiko pa Digicel Boneiru. Durante di e aktividat tabata tin oportunidat pa kumpra telefonnan na preisnan super atraktivo. E ambiente tabata realmente dushi durante henter e dia, e aktividat a resultá un grandioso ban topa pa habitantenan di Amboina. Riba foto por mira boluntarionan i e tim di Digicel poniendo ‘man na obra’ durante di e aktividat di ‘Bario Ekstraordinario’ na Amboina djasabra último.